Киин куоракка Геологтар искибиэрдэрин бастакы тааһа уурулунна

Дьокуускайга  Геологтар искибиэрдэрин бастакы тааһа уурулунна. Аныгылыы сынньалаҥ сирэ Киров уонна Орджоникидзе уулуссаларын быһа охсуһуутугар баар буолуоҕа уонна  бэтэрээннэр өрдөөҕү ыра санааларын толоруоҕа.

Искибиэр бастакы тааһын үөрүүлээх быһыыга-майгыга ууруу сиэрэ-туома ахсынньы 5 күнүгэр Сир баайын туһаныы II Уһук Илиннээҕи пуорумун чэрчитинэн ыытылынна. Бу тэрээһин улахан суолталааҕын «Роснедр» салайааччыта Олег Казанов бэлиэтээтэ.

«Уһук Илиннээҕи сир баайын туһаныы пуорума геологтар искибиэрдэрин бастакы тааһын ууруутуттан саҕаланарыгар улахан бэлиэ суолта баар. Бу биһиэхэ олус кэрэхсэбиллээх, тоҕо диэтэххэ, геология суолтатын  үгүс өттө геологтар үлэлэрин түмүгэр олоҕурарын дьоҥҥо-сэргэҕэ өйдөтөрбүтүгэр күһэллэбит. Сороҕор биһиги уопсастыбаҕа суох курдукпут, ол эрээри ити Саха сиригэр сыһыана суох. Манна геологтары билэллэр, өйдүүллэр уонна таптыыллар. Геология — бүгүҥҥү эрэ күн буолбатах. Геология — кэлэр кэскилбит», — диэтэ Олег Казанов.

«Бүгүн олус үөрүүлээх күн — Саха сирин бары геологтарын ыра санаата дьэ туолан эрэр. Геология диэн биһиги өрөспүүбүлүкэбит уонна сайдыытын төрдө, бырамыысыланнас олоҕо. Бу ыра санаабыт туһунан элбэҕи суруйбуппут. Искибиэр ыччаты тардыа, салааҕа үлэлиэх баҕалаах эдэр исписэлиистэр элбииллэригэр көмөлөһүө дии саныыбыт», — диэн геология бэтэрээнэ Руслан Петров санаатын үллэһиннэ.