Киин үлэтэ саҕаланыаҕыттан 123 тыһ. мэдиссиинискэй көрүүнү оҥорбут

Ил Дархан Айсен Николаев бэҕэһээ, тохсунньу 9 күнүгэр, оробуочай сырыытынан  Дьокуускайга баар Искэн киинин үлэтин билистэ. Бу киин 2024 сыл олунньутугар үлэҕэ киирбитэ. Аһыллыытыгар онлайн-эрэсииминэн  РФ бэрэсидьиэнэ  Владимир Путин кыттыбыта. 

«Саҥа киин үлэҕэ киириитэ Саха сирин олохтоохторо дойдуларыттан ырааппакка, үрдүк мэдиссиинискэй көмөнү ылалларыгар улахан төһүү күүһүнэн буолла. Киин үлэтэ саҕаланыаҕыттан 123 тыһ. мэдиссиинискэй көрүүнү оҥорбут, барыта 4,4 тыһ кэриҥэ искэн ыарыыта баара быһаарыллыбыт. Тустаах быраастар искэн ыарыыны эрдэ билиигэ уонна эмтээһиҥҥэ аныгы үрдүк технологияны баһылыырга күүскэ ылсаллар. Ыарыыны эрдэ быһаарыы ыарыһаҕы эмтииргэ-томтуурга улахан оруоллаах», – диэн Айсен Николаев  эттэ.

Саха сиринээҕи искэн киинин кылаабынай бырааһа Татьяна Николаева: «Биир сүрүн саҥаны киллэриибитинэн Эндоскопия киинин аһан үлэлэтиибит буолар, манна Дьокуускай уонна улуустар олохтоохторо көрдөрөр кыахтаннылар. Ааспыт сылга 10 тыһ. тахса көрүүнү оҥорбуппут. Үөс уонна ноор синньигэс утахтарын (4 миллиметр) аныгы дэниллэр видеоэндоскопия көмөтүнэн көрөр кыахтанныбыт. Аныгы эндоскопия кыаҕа улахан буолан, куртах кыра даҕаны ворсинкатын көрөр буоллубут», – диэн быһаарда.

Аныгы оборудованиелар элбээбиттэрин түмүгэр, КТ-чинчийии биэс төгүл уонна МРТ-чинчийии үс төгүл улаатыннарыллыбыт. Эпэрээссийэни оҥоруу 52%  уонна уодаһыннаах искэни бастакы стадиятыгар булуу 46%  улааппыт. Сиһилии бу сигэнэн киирэн https://www.sakha.gov.ru/news/18260 билсиҥ.