Ким да саастаах көрүҥнээх буолуон баҕарбат

Бу көстүү ордук кэрэ аҥаардары долгутар. Омуна суох, билигин 30-таах да, 50-наах да дьахтары араарымыахха сөп. Оттон эр дьон, хомойуох иһин, бэйэлэрин көрүммэт буоллахтарына, 40 саастарын аастылар да истэнэн, баттахтара маҥхайан, сааһыран бараллар…

Дьиктитэ, дьахтар успуордунан дьарыктанан синньииргэ туруммут буоллаҕына, кини этэ-сиинэ сымнаҕаһыттан бу үлэ бытааннык барар. Оттон эр киһи бэйэтин көрүнэн саҕалаатаҕына, кылгас кэм иһигэр быччыҥ да үүннэриэн сөп эбит. Онон дьахтар аймах бэйэтин көрүнүүтүгэр эр дьонноооҕор быдан элбэх бириэмэни уонна харчыны барыыр диэн эспиэрдэр бэлиэтииллэр.

Кырдьыыга туох тиэрдэрий?

Уйулҕа үлэһиттэрэ бэлиэтииллэринэн, санааҕа-онооҕо ылларар киһи түргэнник сааһырар эбит. Кини аһын туттуммат, успуордунан дьарыктаммат. Оттон эт-сиин эрчимэ суох буоллаҕына, ханнык да сыаналаах кириэм көмөлөспөт эбит. Маны сэргэ кырдьыыга тиэрдэр сүрүн төрүөт — табах тардыы уонна арыгы иһии. Биир үрүүмкэ аһыы утах киһи этигэр-сиинигэр 45 күн сылдьан сүһүрдэр. Оттон табах буруота киһи тыҥатыгар иҥэр. Тыҥа киһи доруобуйатын фильтрэ буолар. Билигин кэрэ аҥаардар кырдьымаары, бастакы сурааһын мырчыстыы таҕыста да сыаналаах кириэм атыылаһа охсоллор. Ол эрээри кириэм сымнатыан уонна салгыы мырчыстыы үөскээбэтин туһугар үлэлэһэр эрэ кыахтаах. Кини номнуо баар мырчыстыылары суох оҥорор кыаҕа суох. Оттон косметологическай солуоҥҥа мырчыстыыны суох оҥоруохха сөп дуо?

30 саас

Косметология эйгэтигэр киһи сааһа диэн өйдөбүл суох. Ханнык баҕарар эдэргэ түһэрэр өҥөнү киһи сааһыттан тутулуга суох оҥоруохтарын сөп. Ким эрэ отутун ааһаат мырчыстар, ким эрэ 60 ааһыар диэри эдэрчи көрүҥүн сүтэрбэт. Косметологтар киһи сирэйин хас да көрүҥҥэ араараллар. Бытархай элбэх мырчыстыылаах, сылайбыт көрүҥнээх, сирэй быһыыта уларыйбыт, испит (отечно-деформационнай) диэҥҥэ араараллар. Ол эрээри үгүстэр 30 сааска сирэй тириитин ыраастатыыттан атын өҥөнү туһанар наадата суох дииллэр. Аныгы косметология сүбэлииринэн, киһи сирэйин, этин-сиинин барытын отут сааһыгар диэри кыра-кыралаан көрүнэ, оҥосто сылдьыахтаах эбит. Косметологтар бэлиэтииллэринэн, аһары мырчыстыбыт, олох көрүнүллүбэтэх сирэй тириитин кинилэр аптаах дьон курдук уларытар кыахтара суох. Эдэр дьон үксэ пилинг, ботулинотерапия, биоревитализация өҥөтүнэн туһаныахтарын сөп. Бу улахан буортута суох өҥө диэн бэлиэтииллэр косметологтар. Сирэй тириитигэр коллаген кислотатынан толорон биэрии буолар. Бу сааска кэрэ аҥаардар үксүн кыламаҥҥа, уоска болҕомто уураллар. Кинилэр уос улаатыннараллар, кыламан кэтэллэр. Оттон күн аайы тохтоло суох кыламан килиэйдэтэн кэтии, шеллак оҥорторуу син биир буортулааҕын умнумаҥ.

40 саас

Бу сааска диэри аҥаардас кириэминэн, маасканан эрэ муҥурдана сылдьыбыт буоллаххына, солуоҥҥа сылдьан идэлээх дьон көмөтүн туһаныахха сөп буолар. Сылга иккитэ биоревитализацияҕа сылдьыы сирэй өҥүн сырдатар, коллаген саппааһын элбэтэн биэрэр эбит. 40 саас ааһыыта киһи сирэйин тириитэ коллагены үөскэтэрэ намтыыр. Маҥан баттах элбиир. Ордук дьахтар аймах бу сааһыттан этигэр-сиинигэр эмиэ уларыйыылар бараллар. Кини түргэнник сылайымтыа, кыраттан кыыһырымтыа буолуон сөп. Тас көрүҥүн көрүнэр дьахтар олоххо эмиэ судургутук уонна көхтөөхтүк сыһыаннаһар дииллэр уйулҕа үлэһиттэрэ. Кини сааһырдым диэн ыһыктынан кэбиспэтэх, бу сааһыгар диэри уойбатах уонна эдэрчи эрчимнээх көрүҥнээх буоллаҕына, хайҕыахха эрэ сөп. Доруобуйата этэҥҥэ буоллаҕына, солуоҥҥа сылдьан бары өҥөнү туһаныан сөп. Ууну хана утуйуу уонна салгыҥҥа сылдьыы олус суолталааҕын умнуо суохтаах.

50 саас

Бу сааска диэри солуоҥҥа сылдьыбатах буоллахха, сирэйиҥ тириитэ үчүгэй диэн сыаналыыллар эбит косметологтар. Ол эрээри туох баар солуон укуоллара, тупсарыылара киһи 35 сааһын кэннэ туттуллуохтаахтар. Оттон олох бэйэтин көрүммэккэ сылдьыбыт дьахтар 50 сааһыгар көрүнэргэ туруммут буоллаҕына, кини элбэх харчыны уонна солуоҥҥа сылдьыы икки ардынааҕы бириэмэтэ чугас-чугас буолар. Дьахтар сирэйэ (отечно-деформационнай) испит курдук, быһыыта уларыйан эрэр буоллаҕына, киниэхэ гидроксиапатит кальция диэннээх филлер көмөлөһүөн сөп эбит. Бу сааска ботулинотерапия көмөтө номнуо кыра буолар. Үгүстэр (нитевой фейслифтинг) туһунан толкуйдууллар. Ол эрээри бу быстах эрэ кэмҥэ сирэй түспүтүн тутуон сөп. Онон уопуттаах косметологтар аппараатынай методикаттан саҕалыыры сүбэлииллэр. Ол эрээри аҥаардас косметолог эрэ өҥөтүнэн буолбакка, сөптөөх битэмиини иһии, ууну ханан туруу, салгыҥҥа сылдьыы улахан суолталааҕа биллэр. 50 сааска хойуу чэй, кофе сүрэххэ буортулааҕын өйдүөхтээх.

60 cаас

Бу мындыр сааска дьахтар бэйэтин сөпкө көрүнэр, аһын туттунар, салгыҥҥа сылдьан хаамар, истириэһэ аҕыйах буоллаҕына, кини сааһын бутуйуохтарын сөп. Бу сааска эдэр сылдьан киһи тугунан дьарыктаммыта, тугу үлэлээбитэ барыта көстөр дииллэр эбит. Наар ыарахан, хара үлэҕэ сылдьыбыт дьахтар сүһүөхтэрэ мөлтөөн-ахсаан, баттаҕа түһэн, тииһэ-уоһа бараныан сөп. Оттон эдэр эрдэҕиттэн бэйэтин кэм көрүммүт дьахтар доруобуйата да эрчимнээх буолар. Бу сааска дьахталлар косметологка сылдьаллара аччыыр. Кинилэр сүрүн болҕомтону сирэйдэригэр буолбакка, уопсай туруктарыгар уураллар. Ол эрээри олус баҕалаахтар арыый сымнаҕас көрүҥнэргэ сылдьыахтарын сөп. Кинилэргэ ордук массаас, мезотерапия, химическэй пилинг барсыан сөп. Дьиэҕэ сымнаҕас мааскалары туттуохтарын сөп.

Косметологтар эдэргэ түһэрэр өҥөлөрө

Биоревитализация — сирэй тириитин аннынан гиалуроновай кислотаны угаллар. Бытархай мырчыстыылар сүтэллэр, сирэй биллэ сырдыыр.

Мезотерапия — сирэй тириитин уопсай тупсарар оруоллаах. Тирии саҥардыллар, сырдыыр.

Озонотерапия — сирэй тириитигэр кислород киирэн тупсарар.

Плазмотерапия — сирэй тириитигэр бэйэ плазматын киллэрэллэр. Бытархай мырчыстыылар сүтэллэр, сирэй өҥө тупсарар.

Контурнай пластика — тирии иһинэн сирэй быһыытынан-таһаатын уларытыы буолар.

Лазернай терапия — сирэй бээтинэлэрин, мырчыстыылары сүтэрэр.

СМАС-лифтинг — эпэрээссийэтэ суох сирэй тириитин үөһээ тардар, сырдатар.

Сирэй быһыыта уларыйан, түһэн эрэр курдук буоллаҕына…

Киһи тугу аһыыра, олоҕун хаачыстыбата хайдаҕа сирэйигэр көстөр дииллэр. Ол эбэтэр өрүү аһыыны эбэтэр аһары минньигэһи, бурдук аһы сиир киһи түргэнник уойар. Ыйааһына сотору-сотору халбаҥныыр киһи сирэйин быһыыта эмиэ уларыйар. Эмискэ тоҕо түһэн аччыктаан синньээһин эбэтэр урукку өттүгэр успуордунан дьарыктаммакка гынан баран, соһуччу дьарыктаныы сүрэххэ куһаҕаннык дьайыан сөп. Сирэй өр эдэр сылдьарыгар сүбэлэр:

— Эти-сиини сөптөөх кээмэйгэ, ыйааһыҥҥа тутуу

— Аһары туустааҕы, саахардааҕы сиэбэт буолуу

— Сууккаҕа 2 лиитирэ ууну иһии

— Лимфодренажнай массааска сылдьыы. Эккэ-сииҥҥэ уу мустубутуттан босхолонуу

— Хаачыстыбалаах косметиканан туттуу.

— Сиһи, көхсүнү көнөтүк туттуу

— Сибиэһэй салгыҥҥа хаамыы.

Омос көрдөххө, киһи бэйэтин көрүнэригэр өҥө арааһа элбэх. Ол эрээри хас биирдии киһи доруобуйатын туруга араас буолар. Кимиэхэ эрэ сөп түбэһиэн эбэтэр түбэһимиэн сөп. Хаачыстыбалаах косметиканан туттуу уонна күн уотуттан харыстаныы, сөптөөх ыйааһыны тутуу дьахтар эдэрчи көрүҥүн уһатар кыахтааҕын умнумаҥ.