«Книга чудес» остуоруйа оҕолору сэргэхситиэ

Марфа, Сергей Расторгуевтар ааттарынан Саха циркэтэ үгэс буолбут Саҥа дьыллааҕы «Книга чудес» саҥа испэктээкилин сүрэхтээтэ.

Бу нуучча остуоруйаларыгар олоҕурбут испэктээкил. Манна бааллар, Емеля бэйэтэ сүүрэр оһоҕун кытта, Жар-птица, Змей Горыныч, Кащей Бессмертный, Леший, Снежная Королева, Сэлии оҕото, о.д.а. дьоруойдар.

Бу барыта циркэ ускуустубатын кытта дьүөрэлэһэр. Дьоруойдар бэйэлэрэ ханаатынан хаамар акробаттар, куупал аннынан көтөр, салгыҥҥа кулахачыйар гимнастар, уотунан оонньуур жонглердар, көрдөөх клоуннар, үҥкүүһүттэр буолан, оруолларын арыйан көрдөрөллөр. Бэл, Кащейбыт мээчиктэринэн жонглердуур. Буоларын курдук, көстүүмнэрэ бэрт сиэдэрэй. Горыныч, Сэлии, Леший курдук улахан, хамсыыр уобарастара сөхтөрөллөр.
Дрессировщик Мария Жиркова салалтатынан, аттар киирэн, истигэн баҕайытык араас трюктары оҥорбуттара оҕолору олус сэргэхситтэ.
Биллэн турар, дьоруойдар Хаарчаананы быыһыы бараллар, араас мүлчүргэннээх сырыыларга түбэһэллэр.

Саҥа дьыллааҕы сынньалаҥҥа оҕолору кытта кэлэн, чаҕылхай испэктээкили көрөн, сэргэхсийэргэ бэртээхэй эбит.