Колымана оҕолоругар аатта толкуйдааҥ

«Орто дойду» зоопаркаҕа олорор Колымана диэн үрүҥ эһэ быйыл кыһын төрөөбүт оҕолорун аан бастаан таһырдьа таһаарда. Бу туһунан Ил Дархан Айсен Николаев телеграм-ханаалыгар иһитиннэрдэ.

— Исписэлиистэр эһэ оҕолоро чопчу хаһан төрөөбүттэрин быһаардылар — ахсынньы 23 күнүгэр төрөөбүттэр. Колымана икки оҕону төрөппүт — уолу уонна кыыһы. Кырачааннар майгылара тус-туһунан, кыыс ордук эрчимнээх, көхтөөх, оонньуурун, ойуоккалыырын сөбүлүүр, уол ийэтин аттыттан арахпат. Эһэ оҕолоро саҥа түспүт сыа  хаарга буккулла оонньоотулар. Бу кырачаан эһэчээннэргэ аат толкуйдуоххутун сөп. Зоопарк уонна «Роснефть» хампаанньа кыттыһан күрэс биллэрдилэр. Ааттары mishki.malyshki@mail.ru диэн электроннай буостаҕа ыытыҥ, – диэн Айсен Николаев суруйда.

Ааттар паараласпыт буолуохтаахтар, холобур,  «Лоокуут-Ньургуhун», «Миша-Маша» диэн, маны тэҥэ, бэйэҕит ааккытын, төлөпүөҥҥүт нүөмэрин, ханна олороргутун суруйаргытын умнубаккыт.

Онтон зоопарк уонна «Роснефть» үлэһиттэрэ саамай үчүгэй ааттары талан баран, уопсай куоластааһыҥҥа таһаарыахтара. Онон ааттары куоластааһын түмүгүнэн талаллар. Түмүгү муус устар 13 күнүгэр ВДНХ-ҕа «Роснефть» павильонугар таһаарыахтара. Кыайыылаах өйдөбүнньүк сувенирдарынан наҕараадаланыаҕа.

Колымана уонна Ломоносов үһүс төгүлүн оҕолоннулар. Билигин кинилэри тус-туспа вольердарга туталлар, тоҕо диэтэр, үрүҥ эһэлэр айылҕаларын быһыытынан, оннук быһыы ирдэнэр. Кыһыны быһа арҕахха сыппыт буолан, сап-саһархай өҥнөммүттэр.

Колымананы 2012 сыллаахха Аллараа Халыма оройуонун «Эһэ арыылара» архипелагка тулаайах хаалбытын, булбуттара. Оттон Ломоносов Ленинград зоопаркатыгар төрөөбүтэ, улааппыта, кэлин Дьокуускайга аҕалбыттара. «Роснефть» хампаанньа көмөтүнэн, үрүҥ эһэлэргэ икки вольеры туппуттара. Колымана төрүүр, оҕолорун иитэр арҕахтаах, онно камераларынан кэтээн көрөллөр.

2016 сыллаахха Колымана Хаарчаана диэн бастакы оҕотун төрөппүтэ, кини билигин Ленинград зоопаркатыгар олорор. 2019 сыллаахха Алмаз диэн уолламмыттара, кинини Хабаровскайдааҕы зоопарка иитэ ылбыта. Үрүҥ эһэ зоопаркаҕа төрүүрэ-ууһуура сэдэх көстүү буолар.

Ил Дархан, бырабыыталыстыба дьаһалтатын пресс-сулууспата.