“Креативнай индустрия дьоҕус академията” ааспыт сылга таһаарыылаахтык үлэлээбит

Арктикатааҕы култуура уонна ускуустуба судаарыстыбаннай институтун “Креативнай индустрия дьоҕус академията”  бырайыак ааспыт сыллааҕы үлэтин туһунан, тэрийээччилэр бүгүҥҥү пресс-кэмпириэнсийэҕэ кэпсээтилэр. Бырайыак иитинэн былырыын барыта 600 оҕону хаппыт.

Үөрэх уонна билим министиэристибэтин, Кэлэр көлүөнэ пааркатын, АЛРОСАны кытта ыкса ситимнээхтик үлэлииллэр.

Үөрэх уонна билим миниистирин бастакы солбуйааччы Михаил Присяжнай: “Оскуолалар, уһуйааннар, эбии үөрэхтээһин тэрилтэлэрэ саҥа тэрилинэн хааччылыннылар, киинэ да оҥоруохтарын, дизайнынан даҕаны дьарыктаныахтарын, төрүт үгэстэри, сатабыллары аныгы ньымаҕа көһөрүөхтэрин сөп. Ол эрээри, манан исписэлиистэр дьарыктаныахтаахтар. Онон АГИКИ ис-иһиттэн ураты көрүүлээх үрдүк үөрэх кыһата буоларын быһыытынан, кэнсиэпсийэ оҥорбута, оскуолалар, нэһилиэктэр тустаах бырайыакка кыттыһар кыахтара үөскээтэ. Ааһан эрэр үөрэх дьыла көрдөрөрүнэн, бырайыак үтүө түмүктэрдээх. Бастакылар номнуо араас кэмпириэнсийэлэргэ кытыннылар, ол иһигэр аҕыйах хонуктааҕыта буолан ааспыт “Инникигэ хардыы” билим-быраактыка кэмпириэнсийэтигэр” – диэн эттэ.

Тустаах салааҕа бырайыакка киирбит оскуолалары эрэ буолбакка, идэҕэ эрдэттэн туһаайыыга киэҥ хабааннаах үлэни ыытар санаалаахтар.

Арктикатааҕы култуура уонна ускуустуба институтун бастакы проректора Станислав Иванов бырайыак туһунан сиһилии кэпсээтэ: “Оҕолору кытта үлэлиир дьон бастакы билиини иҥэрэн, оҕолор онтон тирэх ылан салгыы сайдалларыгар соруктаах үлэлииллэр. “Креативнай индустрия дьоҕус академията” бырайыак ол соругу толорор аналлаах. Оскуола үөрэнээччилэрэ култуураны, ускуустубаны, дизайны, киинэни кытта сибээстээх анимацияҕа, муодаҕа, айар дьоҕурга үлэлэһэллэригэр кыах биэрэр. Уопсай өйдөбүлү эрэ иҥэрэн кэбиспэккэ, бу хайысханан инникитин хамнас аахсалларыгар билиини иҥэрии буолар. Ол иһин креативнай экэниэмикэ диэн ааттанар”.

“Креативнай индустрия дьоҕус академията” архитектураҕа Арктика улуустарыгар “Твой АГАГУК” үөрэх эспэдииссийэтэ, оскуолаларга фирменнэй кылаастар, олимпиадалар, креативнай былаһааккалар, идэҕэ урутаан бэлэмниир тэрээһиннэр  — КиноМАНия  уонна Медиахакатон киирэллэр.

Күн бүгүн өрөспүүбүлүкэҕэ барыта 8 фирменнэй кылаас аһыллыбыт (Сахаполитиэхиньиичэскэй лиссиэй, Чурапчы гимназията, Чурапчы улууһун Одьулуун орто оскуолата, Өлүөхүмэ улууһун “Эврика” гимназията, Ньурба улууһун Чаппанда орто оскуолата, Бүлүү улууһун Тааһаҕар орто оскуолата, Өлөөн эбэҥки национальнай нэһилиэгин Дьилиндэ орто оскуолата, Амма улууһун Амма-Наахара орто оскуолата).

“Твой АГАГУК” үөрэх эспэдииссийэ чэрчитинэн былыырын үлэһиттэр Эдьигээн, Дьааҥы, Булуҥ, Өлөөн улуустарыгар баран үлэлээн кэлбиттэр. “Агагук диэн хотугу уолчааҥҥа суолун ыйан-кэрдэн биэрбит хотугу көтөр. Биһиги идэҕэ эрдэттэн бэлэмниирбит быһыытынан бу аат ордук барсар эбит диэн талбыппыт” – диэн тустаах бырайыак куратора Александра Суорская кэпсиир. Үөрэх бырагырааматын биллэр-көстөр учуонайдары, креативнай индустрия исписэлиистэрин, институт устудьуоннарын кытта сүбэлэһэн оҥорбуттар. Бу иитинэн мультимедиаттан саҕалаан киинэни оҥорууга, граны суруйууга тиийэ куурустары бэлэмнээбиттэр. Үөрэх түмүгүнэн манна кыттыбыт оҕолор бэйэлэрин бырайыактарын ситиһиилээхтик көмүскээбиттэр. Барыта 236 оҕо үөрэммит. Маны таһынан улуус, култуура, үөрэх салааларын салайааччыларын кытта көрсүһэн салгыы үлэлэһии туһунан кэпсэппиттэр.

Бырайыак хабар хайысхата киэҥ, ол курдук, быйылгыттан онлайн оскуола иитинэн АГИКИга туттарсар үөрэнээччилэри литэрэтиирэ биридимиэтигэр биир кэлим эксээмэҥҥэ бэлэмнэниэхпит диэн иһитиннэрэллэр. Тоҕо диэтэххэ, оҕолор биир ыарырҕатар биридимиэттэринэн литэрэтиирэ буолар.

Үүммүт сылга “Креативнай индустрия дьоҕус академиятын” тэрийээччилэрэ оҕолор айар кыахтарын сайыннарыыга, креативнай индустрияҕа саҥа саҕалаан эрэр исписэлиистэри өйүүр үлэлэрин салгыахтара.