«Кросс нации» ситиһиилээхтик кытынныбыт

Бу күннэргэ Н.Е. Мординов-Амма Аччыгыйын аатынан Харбалаахтааҕы үөрэхтээһин холбоһугар кылаас таһынан үлэ ньиргиччи бара турар.

Ол курдук, балаҕан ыйын 24 күнүгэр холбоһук 1-11 кылааһын үөрэнээччилэрэ үгэс буолбут күһүҥҥү субуотунньукка күргүөмүнэн тахсан үлэлээтибит. Үөрэнэр оскуолабыт таһын, оскуола эҥэр сыста сытар нэһилиэкпит сирин ыраастаатыбыт. Хата, халлаан туран биэрэн абыраата.

Төрдүс кылаас үөрэнээччилэрэ нэһилиэк субуотунньугар кыттыһан, төрөппүттэрин кытта пааркаҕа талах олортулар. Учууталлара Татьяна Семеновна Севостьянова оҕолоро үтүө дьыалаҕа бэйэлэрин баҕаларынан кыттыбыттарыттан олус үөрдэ.

Бэҕэһээ күн уота чаҕылыччы тыган, сайыҥҥылыы сылаас күн турбута. «Кросс нации» кыттан, холбоһук бары үөрэнээччилэрэ анал дистанциялары сүүрдүлэр. Кырачааннарга кыргыттарга: Горохова Виолетта (2 кыл.) — бастакы, Ананьева Мичийэ (1 кыл.) — иккис, Кириллина Сандаара (2 кыл.) үһүс буоллулар.

Уолаттарга: Нестеров Диар — бастакы, Захаров Айтал —  иккис, Сотрудников Алеша үһүс миэстэлэри ыланнар (бары иккис кылаастар) кыайыы үөрүүтүн биллилэр.

Үөрэнээччилэр бары көхтөөхтүк кытыннылар. Сүүрүү иннинэ эти-хааны уһугуннаран, эрчиллиилэри оҥордубут.

Онон үлэни, сүүрүүнү тэҥҥэ тутан, оҕолор күн бокуойа суох сырыттыбыт. Бу барыта киһиэхэ олус туһалааҕын бары өйдүүбүт

Виолетта ПЕТРОВА,

Таатта, Харбалаах