Кубулҕаттаах кулун тутар

Кулун тутар — Дьөһөгөй Айыы ыйа үүннэ диэн хаһыатттартан, ватсаптан ааҕабыт, радиоттан, ТВ-тан истэбит.

Ол гынан баран, Саха Таҥаратын итэҕэлэ Таҥарианство (Таҥара — Таҥарианство, Христос — Христианство диэн курдук} үөрэҕинэн сылы, ыйы Үөһээ Айыылары кытта сэргэ, Сирдээҕи Айыылар — Иччилэр салайсаллар.
Иччилэр Таҥара Орто дойдуга анаан олохтообут Айыылара буолаллар. Иччилэр олохтоох Айыылар быһыытынан сир олоҕун-дьаһаҕын үчүгэйдик билэллэр. Кулун тутары Дьөһөгөй Айыы уонна Түмэл Тойон — Сэргэ иччитэ салайаллар. Быйылгы сылы эмиэ кинилэр дьаһайаллар. Онон иккиэн сылгыга сыһыаннаах Айыылар буоланнар, быйыл сылгыга үчүгэй сыл буолуохтаах.
Оттон ааспыт 2023 сылы Одун Хаан уонна Ытык Чыыбыстаан — Тыл Иччитэ салайбыттара, ол иһин ити сыл Тыл сайдыытыгар улахан хамсааһын тахсыбыта.

Саха Саҥа сыла ыам ыйын 22 күнүгэр сайыны кытта бииргэ кэлэр. Ол гынан баран, Таҥарианство итэҕэлэ ыам ыйын 22 күнүгэр православнай итэҕэллээхтэр Сибэтиэй Ньукулай — Ньукуола күнүн бэлиэтииллэрин, оттон саха дьоно Ньукуола таҥараны сайын кэлэрин кытта сибээстээн билиҥҥээҥҥэ диэри улаханнык үөрэн, сүргэлэрэ көтөҕүллэн туран бырааһынньыктыылларын, онон ити күн үгэс курдук буолан норуокка олоҕурбутун быһыытынан уонна ыам ыйын 22 күнэ куруук сынньалаҥ күҥҥэ түбэспэтин учуоттаан, саха Саҥа сылын сыл аайы ыам ыйын бүтэһик субуотатыгар бэлиэтиир. Холобур, быйыл 2023 сылга ити бырааһынньык ыам ыйын 27 күнүгэр ыытыллыаҕа.

Билигин биһиги эргэ 2022 сылга олоробут. Онон саха Саҥа сылыгар диэри Орто дойдуга былааһы Одун Хаан уонна Ытык Чыыбыстаан тутан олороллорун өйдүөхтээхпит. Дьөһөгөй Айыы уонна Сэргэ иччитэ Түмэл Тойон ыам ыйын 22 күнүттэн, атыннык эттэххэ, Саха сиригэр саҥа 2023 сыл саҕаланар күнүттэн салайан-дьаһайан барыахтара.

Онон күндү доҕоттор, Дьөһөгөй уонна Түмэл Айыылар салайар кубулҕаттаах кулун тутар ыйдара саҕаламмытынан истиҥник эҕэрдэлиибин!
Чэгиэн, Ситиһиилээх, Дьоллоох буолуҥ! Тускуо!

Гавриил Угаров-Эһээ Дьыл