Кыайыы улахан үлэнэн ситиһиллэр

Ыам ыйын 17-19 күннэригэр Саха Өрөспүүбүлүкэтин Бастакы Бэрэсидьиэнэ Михаил Николаев кэриэһигэр көҥүл тустууга Арассыыйа устудьуоннарын чөмпүйэнээтэ буолан ааста.

Хапсыһыылар “Кыайыы 50 сыла” успуорт дыбарыаһыгар ыытылыннылар. Тустуу сайдыбыт эрэгийиэннэрэ түмүстүлэр. Уһук Илинтэн (Бурятия тыа хаһаайыстыбатын Академията, Бурятия, Хабаровскай, Биробиджан университеттара),  Волгатааҕы федеральнай уокуруктан (Мордовия, Оренбург, Казань, Самара, Ульяновскай, Чебоксары), Хотугу Кавказтан (Хотугу Осетияттан икки, Дагестан),  Хотугулуу-Арҕаа уокуруктан (Великие Луки), Сибииртэн (Иркутскай, Кемерово, Новокузнецкай, Красноярскайтан икки, Тува), Киин уокуруктан (Воронеж, Москваттан биэс, Смоленскай), Соҕуруу уокуруктан (Краснодар), Хотугулуу-Илин федеральнай уокуруктан (Арктическай агротехнологическай, култуура-ускуустуба, М.К. Аммосов аатынан университет, Чурапчы института), барыта, 32 үрдүк үөрэх кыһаларын хамаандалара кытыннылар.

Чөмпүйэнээт үөрүүлээхтик аһыллыытын норуот артыыстара Клавдия уонна Герман Хатылаевтар салайааччылардаах “Тэтим” барабаанньыттарын, “Ситим”, “Уран”, “Кыталык”, “Умсан” үҥкүү ансаамбыллара, “Тэтим” этно-бөлөх киэргэттилэр, Саха Өрөспүүбүлүкэтин физическэй култуураҕа уонна успуорка миниистирэ Леонид Спиридонов, Арассыыйа устудьуоннарын тустууга лигатын Бэрэсидьиэнэ Мурат Остаев, М.К. Аммосов аатынан ХИФУ проректора Александр Ильин, Бүтүн Арассыыйатааҕы категориялаах сүрүн судьуйа Вячеслав Кривошапкин эҕэрдэлээтилэр.

Аан дойду устудьуоннарын чөмпүйэнээтигэр сүүмэрдиир суолталаах, икки-үс күн устата ыытыллыбыт сытыы, тыастаах бырахсыылардаах киирсиилэргэ күүстээхтэр кыайыылары ситистилэр. Кыайыы үөрүүтэ, хотторуу хомолтото, хаһан да буоларын курдук, бүтэһик сөкүүндэлэр тэтимнээх тустуулар, ыгааһыннар быһаарыылара, күүс-кыах өрөгөйдөөһүнэ, бэртэр самнарсыылара — барыта баар буоллулар.

Саха сирин үрдүк үөрэхтэрин кыһаларыттан кыһыл көмүс мэтээллэри 70 кг Чурапчыттан Олег Фомин, Дьокуускай ХИФУ университетыттан 74 кг Станислав Свинобоев аҕаллылар. Хотугу Осетия Владикавказ университетыгар үөрэнэр Үөһээ-Бүлүү ыччата 125 кг бастаабыт Харысхан Баппаҕай эмиэ “бэйэбит киһибит”. 57 кг Чурапчы институттан Любомир Ашеин үрүҥ көмүс, Алексей Копылов (ХИФУ) үһүс; 61 кг Ньургун Терентьев (ЧИФКиС), Александр Авелов (ХИФУ); 65 кг Эдуард Попов (ЧГИФиС); 70 кг Александр Иванов (ХИФУ); 74 кг Константин Капрынов (ЧИФКиС); 79 кг Анатолий Никитин (ЧИФКиС); 86 кг Андриан Ленскэй (ХИФУ); 92 кг Никита Софронов (ХИФУ); 125 кг Никита Хабаров (ХИФУ) боруонса мэтээллэри ыллылар.

Саха устудьуон-бөҕөстөрө 14 мэтээллэннилэр. Хамаанданан түмүккэ, 32 хамаандаттан М.К. Аммосов аатынан Хотугу-Илиҥҥи федеральнай университет бастаата (145 очко), Чурапчы физкултуураҕа уонна успуорка института иккис (123 очко) уонна Хотугу Осетия Владикавказ университета үһүс бириистээх миэстэлэргэ тигистилэр.

Баһылай Посельскай