Кыайыы Знамята Бөрөлөөххө вездеходунан тиийдэ

Аллайыаха улууһун Бөрөлөөх нэһилиэгэр Кыайыы Знамята киэһэ тиийэн кэлбитэ. Вездеходунан Аллайыаха улууһун Бэтэрээннэрин сэбиэтин бэрэссэдээтэлэ Е.Ю.Яковлева, улуус дьаһалтатын култуура отделын начаалынньыга Л.В. Лебедева салайааччылардаах дэлэгээссийэ кэлэн, Кыайыы Знамятын көрсүү  тэрээһинин ыыттылар.

Кыайыы Знамятын улуустан полиция ИВС отделын начаалынньыга И.М. Максимов  арыаллаан илдьэ кэлбит.

Бырааһынньыгы  “Инди” ЭКЦ  кэнсиэринэн киэргэттилэр. Бөрөлөөх нэһилиэгин Дьоруой ийэтэ Е.П. Слепцова кыыһа уолаттарыныын кэлэннэр ыллаан-туойан, дойдуларын дьонун сэргэхсиппиттэрэ олус үчүгэй. Маны таһынан улууска ыытыллыбыт уруһуй күрэҕин түмүгүнэн Бөрөлөөх оскуолатын үөрэнээччилэригэр дипломнары туттартаатылар.

Улуу Кыайыы Знамята тыылга элбэх сымнаҕас түүлээҕи бултаан Кыайыыны уһансыбыт Бөрөлөөх нэһилиэгин дьонугар сэргэтигэр  кэлэн барбыта үөрүүлээх.

Надежда Дьяконова, Аллайыаха, Бөрөлөөх нэһилиэгэ