Кыһыҥҥы чөмпүйэнээт бастыҥ атлеттары түмүөҕэ

Тохсунньу 17-18 күннэригэр Дьокуускайга «Триумф» успуорт уораҕайыгар чэпчэки атлетикаҕа Саха сирин кыһыҥҥы чөмпүйэнээтэ ыытыллыаҕа.

Күрэхтэһии өрөспүүбүлүкэ сүүмэрдэммит хамаандатын састаабыгар күрэсчиттэри сүүмэрдиир түһүмэҕинэн буолуоҕа диэн ЯСИА иһитиннэрэр.

Чөмпүйэнээт эр дьон уонна дьахталлар ортолоругар ыытыллар, ону таһынан балаһыанньа быһыытынан үһүс спортивнай разрядтаах уолаттар уонна кыргыттар кытталлара көҥүллэнэр.

Кыттааччылар ортолоругар үгэс быһыытынан 60, 200, 400, 800, 1500 уонна 5000 миэтэрэҕэ сүүрүүгэ бастыҥнары быһаарыахтара. Ону таһынан муниципальнай хамаандалар икки ардыларыгар 4х400 миэтэрэҕэ эстэпиэтэ буолуоҕа.