Кыталык Уйбаан кинигэтинэн уһуллубут уус-уран киинэ муус устарга сүрэхтэниэ

Муус устар 25 күнүгэр Михаил Лукачевскай “Кыталыктаах кырдалым” диэн уус-уран киинэтэ киэҥ экраҥҥа тахсара күүтүллэр.

Бу киинэ Иван Дьячковскай – Кыталык Уйбаан “Кустугу ситтэрбиэн” диэн ахтыы кинигэтин ис хоһоонугар олоҕуран туруоруллубут. Кыталык Уйбааны Саха сирин олохтоохторо үгүстэрэ билэллэр – кыталыктары дьаныһан туран көрдүүр, хаартыскаҕа түһэрэр биллиилээх кыраайы үөрэтээччи.

Киинэҕэ Зоя Попова, Ньургуйаана Шадрина, Ньургун Бэчигэн, уо.д.а. биллэр артыыстар оонньообуттар. Сүрүн оруолга 8 саастаах Миша Слепцов талыллыбыт.

Саха сирин биир бастыҥ киинэ оператора Семен Аманатов бу бырайыакка толорооччу продюсерынан кыттыбыт.

Бу киинэҕэ хаампат оҕо эйгэтэ, дьону кытта сыһыана, күүстээх санаата, дьулуура хоһуллар. Устуу үксэ Амма улууһугар ааспыт.