Кыыллаах оскуолатыгар тиһэх чуораан буолан ааста (ВИДЕО)

Быйыл Өлүөхүмэ улууһун Кыыллаах орто оскуолатын 16 оҕо бүтэрдэ.  Кылаас салайааччыта – Юлия Борисовна Кугасова. 9-с кылааһы 17 оҕо түмүктээтэ, кылаас салайааччыта – Виктория Викторовна Кузьмина.

Ардахтыа диэн сабаҕалаабыт халлааммыт  бу күн анаабыт курдук туран биэрбититтэн бары да үөрдүбүт.

Ыам ыйын 24 күнүгэр оскуоланы бүтэрээччилэргэ төрөппүттэр кыттыылаах бүтэһик кылаас чааһа буолла. Маҥнайгы учууталлара Нина Николаевна Кугасова, кылаас салайааччыта Юлия Борисовна Кугасова иилээн-саҕалаан ыыттылар. Үөрэппит учууталлара оҕолорун эҕэрдэлээн сэмэй бэлэхтэри туттардылар. Өлүөхүмэ улууһун култуураҕа управлениетын, Кыыллаах нэһилиэгин “Алгыс” култуура кииниттэн уус-уран салайааччы Ольга Афанасьевна Акимова үҥкүүһүт үөрэнээччилэргэ махтал суруктары туттарда. Бастакы  кылаастар эмиэ хаалсыбатылар, хоһоон этэн үөртүлэр, бэйэлэрэ оҥорбут сэмэй бэлэхтэрин туттардылар (кыл. сал. Лена Лазаревна Яковлева). Онтон 4-с кылаас оҕолоро эҕэрдэлэрин ырыанан тиэртилэр (кыл. сал. Татьяна Лазаревна Корнилова).

Салгыы олох киэҥ аартыгар үктэнээри сылдьар оҕолор нэһилиэк бибилэтиэкэрэ Раиса Еремеевна Лавернова бэлэмнээбит ырыатын  бэлэх ууннулар,  Анна Лукинична Турантаева туруорбут үҥкүүтүнэн түмүктээтилэр. Дьон-сэргэ сөҕөн, астынан, дуоһуйан туран көрдүлэр. Оттон төрөппүттэр учууталлары, үлэһиттэри, оҕолорун эҕэрдэлээн минньигэс туордунан күндүлээтилэр.

Сылын ахсын ыытыллар “Көмүс чуораан” бириэмийэни уонна анал ааты иҥэрии биэчэрэ буолла. Тэрээһини 10-с кылаас үөрэнээччилэрэ тэрийэн ыыттылар (кыл. сал. Валентина Прокопьевна Арылахова). Үгэскэ кубулуйбут тэрээһин бэрт көрдөөхтүк, көхтөөхтүк ааста.

Оскуоланы бүтэрэр оҕолорбут эксээмэннэрин ситиһиилээхтик туттаран, былааннаммыт үөрэхтэригэр киирэллэригэр баҕарабыт.

Полина МАКСИМОВА.