Ленин аатынан болуоссакка сэргэлэргэ чорооннору ууруу саҕаланна

Дьокуускайга Ленин киин болуоссатын саҥардыыта салҕанан барар. Бүгүн эбийиэккэ  12 сэргэ холуоннатыгар «бриллиант» чорооннору ууруу саҕаланна диэн СИА иһитиннэрэр.

Сэргэ уус-уран оҥоһуулаах тимиртэн оҥоһуулаах панелларынан уонна алдьаммат тааһынан бүрүллэр. Сырдатыылаах сэргэ холуонналарын инникитин бырааһынньык күннэригэр холбуохтара. Маны таһынан бырайыагынан уотун сырдатыыта муусука доҕуһуоллаах фонтаны кытта бииргэ холбонон үлэлиир кыахтаныа.

Санатар буоллахха, бэс ыйын саҥатыгар Дьокуускайга Кытайтан кэлбит биригээдэ фонтан үлэлиирин көрөн-истэн баран биирдэ барыахтаах. Дизайн-бырайыагы «Якутпроект» оҥорбут.

Болуоссакка үүнээйи олордуллуохтаах, фонтаннаныахтаах уонна 13  миэтэрэ үрдүктээх сэргэлэр турдулар. Көрдөххө болуоссат үс чааска араарыллар: ДП-2 иннинээҕи зона, ускуустуба оскуолата уонна сынньанар сүрүн сир.

2021  с. Илиҥҥи экэнэмиичэскэй пуорумҥа РФ Бэрэсидьиэнэ Владимир Путин Уһук Илин эрэгийиэннэригэр олох хаачыстыбатын үрдэтиигэ туһуламмыт улахан, кэлим бырагырааманы олоххо киллэрии туһунан быһаарыы ылыммыта. 25 куоракка маастар-былааннар оҥоһуллубуттара, ол чэрчитинэн 2030 сылга диэри сайдыы стратегията быһаарыллыбыта.