Салгыы
Ленин болуоссатын саҥардыы үлэтэ алтынньыга түмүктэниэҕэ

Ленин болуоссатын саҥардыы үлэтэ алтынньыга түмүктэниэҕэ

14.02.2024, 12:15
Хаартыска: Никита Федоров.
Бөлөххө киир:

Былырыын балаҕан ыйыттан Дьокуускай киин болуоссатын сөргүтэр үлэ саҕаламмыта. Бу үлэ быйыл алтынньы ыйга түмүктэниэҕэ. Дьокуускай куорат архитектураҕа, куораты тутууга управлениета үлэ кыраапыктан хаалбакка баран иһэрин туһунан иһитиннэрэр. 

Хаартыска: Никита Федоров.

Ахсынньы 25 күнүттэн тохсунньу 20 күнүгэр диэри үлэ тохтуу сылдьыбыта, төрүөтэ биллэр — бытарҕан тымныыларга үлэ ыытыллыбат. Бүгүҥҥү күҥҥэ көтүрүү үлэтэ түмүктэннэ.

— Ленин болуоссатыттан тутуу бөҕө-саҕө тиэйилиннэ, көтүрэр үлэ түмүктэннэ. Тутуу матырыйаалын аҕаллыбыт. Биллэн турар, биһиги үлэбитин болдьохтон эрдэ, сайыҥҥы кэмҥэ бүтэрэр баҕалаахпыт, ол эрээри, фонтаҥҥа тургутар, кэтээн көрөр үлэлэр былааннаммыттар. Ону тэҥэ, докумуоннары кытта үлэ эмиэ уһун болдьохтоох буолар, онон үлэ алтынньы ыйга толору бүтэн, туттарыллыаҕа, — диэн  управление салайааччыта Любовь Папок эттэ.

Бэдэрээтчит быһыытынан үлэлиир»Сэттэ» хампаанньаҕа иһитиннэрбиттэринэн, фонтан улахан өттө сир анныгар саһыаҕа: 8-10 миэтэрэ дириҥҥэ 86 сыбаайа туруоҕа. Болуоссакка уотунан-күөһүнэн киэргэтиллибит түүҥҥү сыана олус уратытык көстүөҕэ. «Ураһа» композицияны прожектордарынан сырдатыахтара. Тротуар билииккэтэ сахалыы оһуордаах буолуоҕа.

Билигин фонтан улахан дьааматыгар үлэ барар, уопсай иэниттэн үс гыммыт иккитин хаһан, буорун тиэйэн таһаардыбыт. Гранит билииккэни аҕалбыт контейнердары туттубут. Салгыы дьааманы тэҥниэхпит, сыбаайаларга аналлаах скважиналары үүттүөхпүт, — диэн «Сэттэ» хампаанньа маастара Иван Кузьмин эттэ.

Ленин болуоссатын сөргүтүү бырайыагын, дизайнын «Якутпроект» ХЭТ  оҥордо. Манна көҕөрдүү, тротуардары, 13 миэтэрэлээх сэргэлэри, кураанах фонтаны оҥоруу киирэр.

Болуоссат үс чааска арахсыаҕа — 2-с №-дээх бырабыыталыстыба дьиэтин иннитэ, Оҕо ускуустубатын дьиэтин иннитэ уонна сүрүн сынньалаҥ зоната. Массыына уонна бэлисипиэт тохтобуллара баар буолуохтара.

Ленин болуоссатын саҥардыы үлэтэ бэрэсидьиэн көҕүлээһининэн тэриллибит Дьокуускай куорат сайдыытын маастар-былаанын олоххо киллэрии чэрчитинэн ыытыллар. «Биһиги сорукпут — аныгы матырыйааллары, ньымалары туһанан, дьоһуннаах олорор усулуобуйаны уонна куорат эйгэтин олохтуохтаахпыт. Бу эрэгийиэннэргэ, куораттарга дьон олохсуйуохтарын, үлэлиэхтэрин, оҕолорун иитиэхтэрин баҕаралларын, эдэр исписэлиистэр үлэлии кэлэллэрин курдук усулуобуйаны оҥоруохтаахпыт», — диэн Владимир Путин этэн турар.

Ил Дархан, бырабыыталыстыба дьаһалтатын пресс-сулууспата.

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
19 июля
  • 17°C
  • Ощущается: 17°Влажность: 94% Скорость ветра: 1 м/с

Сообщить об опечатке

Текст, который будет отправлен нашим редакторам: