Леонид Спиридонов «Азия оҕолоругар» кыттар Саха сирин хамаандатын туһунан кэпсээтэ

VII Норуоттар икки ардыларынааҕы «Азия оҕолоро» спортивнай оонньууларга диэри нэдиэлэ хаалла. От ыйын 28 күнүгэр Владивостокка Өлүөнэ очуостарыттан кэлбит уот умайан, оонньуулары үөрүүлээх быһыыга-майгыга арыйыаҕа. Саха сирин сүүмэрдэммит хамаандата оонньуулар 18 көрүҥэр күрэхтэһэргэ бэлэм. 

Сүүмэрдэммит хамаандабыт бэлэмин, спортсменнары көрсүү, олордуу, успуорт көрүҥнэрин туһунан СӨ Успуорка уонна физическэй култуураҕа миниистирэ Леонид Николаевич Спиридонов СИА-ҕа кэпсээтэ:

— Леонид Николаевич, «Азия оҕолоругар» кыттар Саха сирин сүүмэрдэммит хамаандатын бэлэмэ хайдаҕый?

— Биһиги олус элбэх сүүмэрдиир күрэхтэһиилэри ыытан, бастыҥтан бастыҥнары талбыппыт. Балаһыанньа быһыытынан, билигин өрөспүүбүлүкэттэн 120 оҕо оонньууларга кыттарга бэлэм. Барыта 19 көрүҥҥэ күрэхтэһиилэр буолуохтара. Биһиги хамаандабыт 18 көрүҥҥэ илин-кэлин түсүһүөҕэ, бадминтоҥҥа эрэ кыттыбат. Ил Дархан Айсен Николаев этиитинэн, СӨ Бырабыыталыстыбатын өттүттэн оҕолор бэлэмнэнэллэригэр тустаах сириэстибэ көрүллүбүтэ. Айсен Сергеевич спортсменнары кытта көрсөн, экипировкаларын туттарбыта, ситиһиилээхтик күрэхтэһэллэригэр баҕарбыта. От ыйын 27 күнүгэр хамаанда улахан аҥаара Владивостокка тиийиэхтээх.

— Владивостокка биһиги спортсменнарбыт ханна, хайдах олоруохтарай, аһыахтарай?

— Хамаандалары «Океан» оҕо лааҕырыгар түһэриэхтэрэ. Манна Олимпийскай дэриэбинэҕэ курдук усулуобуйа барыта баар буолуоҕа. Мин бу кыһын «Океаҥҥа» сылдьыбытым, спортивнай эбийиэктэри, култуурунай тэрээһиннэр буолар миэстэлэрин, аһыыр, утуйар сирдэри көрбүтүм. Куорпустар муора кытылыгар тураллар, дьарыктанарга анаан сирдэрдээхтэр, араас былаһааккалар, остолобуойадар бааллар. Онон хамаандалар онно олоруохтара, аһыахтара, дьарыктаныахтара. Бүгүҥҥү күҥҥэ туох үлэ хаалбытын көрсөр тэрийээччилэри кытта кэпсэтэбит, оҥоробут.

— Спортсменнар аһылыктара хайдах буолуоҕай?

— Кыттааччыларга анаан шведскэй остуол оҥорор былаан баар, тоҕо диэтэххэ араас култууралаах, иитиилээх, итэҕэллээх оҕолор кэлиэхтэрэ. Онон бэйэлэрэ көрөн талбыттарын аһыахтара.

— Спортсменнарга мэдиссиинискэй арыаллааһын ордук суолталаах. Бу баар буолуо дуо?

— Билигин өссө даҕаны сорох сбордар бүтэ иликтэр. Оҕолор бары быраас хонтуруолугар сылдьаллар. Хамаанданы кытта түөрт быраас, үс психолог үлэлиир. Арыаллааһын баар, ону кытта битэмиининэн хааччыйыы эмиэ баар. Бу өттүнэн хааччыллыылаахпыт, үлэ толорутук ааспыта.

— Саха сирин сүүмэрдэммит хамаандата ханнык көрүҥнэргэ кыайыыга эрэллээҕий?

— Биһиги хамаандабыт хапсаҕайга, мас-рестлиҥҥэ, ыстаҥаҕа күүстээх. Ону кытта көҥүл тустууга, дзюдоҕа, самбоҕа оҕолорбут мэтээллэри аҕалыахтара диэн эрэнэбин. Атын даҕаны көрүҥнэргэ спортсменнарбытыгар ыалдьабыт, кыайыыга эрэнэбит. Мэдээлинэн уопсай түмүк тахсыбат, ол эрээри официальнайа суох ааҕыыга үс бастыҥ хамаанда иһигэр киирэр инибит. Владивостокка Саха сирин хамаандатын кытта өссө биирдэ көрсүөхпүт.

— Билигин сынньалаҥ, уоппуска кэмэ буолан, Саха сириттэн Владивостокка барааччы элбэх. Кинилэр «Азия оҕолорун» хайдах көрүөхтэрин сөбүй?

— «Азия оҕолорун» туһунан информация барыта тустаах саайтка баар. Онно күрэхтэһиилэр бырагыраамалара, ханна буолаллара ыйылла сылдьар. Ол саайт нөҥүө оонньуулар арыллыыларын, сабыллыыларын билиэттэрин атыылаһыахха сөп. Итиэннэ күрэхтэһии хаамыытын сырдатан сонуннары таһааран иһиэхтэрэ. Владивостокка бастакытын сылдьар дьоҥҥо анаан гиид баар.

— 2024 сылга Саха сирэ аныгыс оонньуулары ыытыаҕа. Владивостокка маныаха туох эмит тэрээһиннэр былааннаналлар дуо?

— 2024 сылга оонньуулар Дьокуускайга буолуохтара диэн докумуонунан бигэргэтиллибитэ. Онон Владивостокка оонньуулар үөрүүлээх сабыллыыларын кэмигэр былааҕы тиэрдии сиэрэ-туома ыытыллыаҕа.

Дьулустаан Сергеев, СИА.