Хаартыска: Константин Тимофеев архыыбыттан.
Оҥоһуллуутугар биэс мөлүйүөн курдук бүддьүөттээх “Лоокут уонна Ньургуһун” саха киинэтэ икки нэдиэлэни кыайбат кэм иһигэр ороскуотун сабыммыт. Бу туһунан ЕАИС чахчыларыгар сигэнэн Кино-театр.ру суруйар.
Тимофей Сметанин “Лоокуут уонна Ньургуһун” сэһэнигэр олоҕуран, режиссер Константин Тимофеев уһулбут, бу күннэргэ Саха сирин киинэ тыйаатырдарыгар сэҥээрини ылбыт киинэ, быракаакка балаҕан ыйын 21 күнүгэр тахсыбыта итиэннэ ый бүтүүтэ номнуо 11 мөл солк. киллэрдэ. Күн бүгүн киинэ хомуура 20 мөл. солк. чугаһаабыт.
“Киинэ эйгэтин араас медиа сырдатааччыларыгар “Лоокуут уонна Ньургуһун” киинэ кассовай хомуура үрдүк түмүктээҕэ соһуччу буолла. Киинэ, Арассыыйа уонна тас дойду чаҕылхай киинэлэрэ баарын үрдүнэн, дойду таһымыгар харчыны киллэриитинэн 15 бастыҥнар кэккэлэригэр бигэтик сылдьар. Бу саха киинэтэ федеральнай таһымҥа буолбакка, эрэгийиэн олохтоохторун эрэ көрүүтүгэр тахсыбытын бэлиэтиир суолталаах. ЕАИС чахчытынан күҥҥэ 30-тан 53 сеанска тиийэр, маныаха киинэ күҥҥэ ортотунан 1 мөл. солк. киллэрэр. Ол түмүгэр, саха киинэлэриттэн кассовой хомуурунан испииһэккэ иккис миэстэҕэ таҕыста”, — диэн АГТ коммуникационнай ааҕыныстыбатын территориялары өрө таһаарыыга эспиэрэ, бокс-офиска эспиэрэ Владислав Шулаев этэр.
Кини этэринэн, “билигин саха сэдэх киинэтэ быракаакка 7 мөл. тиийбэт. Номнуо бу сыыппара Саха сиригэр күүстээх ис ырыынак олохсуйбутун, кыра бүддьүөттээх саха киинэтэ ороскуотун хас да бүк сабынарын туоһулуур”. Өрөспүүбүлүкэ нэһилиэнньэтин ахсаана – баара-суоҕа 1 мөл. киһи.
“Бу сөҕүмэр ситиһии таайыыта – эрэгийиэҥҥэ киинэни оҥоруу хаачыстыбата биллэ үрдээбитэ, олохтоох кинематографтарга эрэгийиэн бүддьүөтүттэн былаас өйөбүлэ. Эрэгийиэҥҥэ киинэни көрдөрүүнү хааччыйыы уонна маныаха технологическай быһаарыыны сөпкө талыы кэккэ төрүөтүнэн буолаллар. Бастатан туран, киинэ тыйаатырдарын ахсаанын элбэтиини этэбин, манна Киинэ пуондата көмөлөспүтэ. Оттон “Экстра Синема” баар буолуоҕуттан, киинэни кыра нэһилиэнньэлээх пууннарга уонна сэлиэнньэлэргэ көрдөрөр буоллулар”, — диэн Шулев бэлиэтиир.
“Экстра Синема” хампаанньа, Саха сиринээҕи технопаарка резиденэ, быраккаакка кинопроектордаах тас дойду оҥоһуутуттан биэс төгүл чэпчэки тэрили оҥорон таһаарбыта диэн саайтка суруллар. Сиһилии манна ааҕыҥ.
Саха сиригэр анал байыаннай дьайыы кыттыылаахтарыгар уонна кинилэр дьиэ кэргэттэригэр анаан "Е-Якутия" порталга «Забота» электроннай…
РФ Үөрэҕириитин уонна Үөрэҕи, билими кэтээн көрөр федеральнай сулууспа кэлэр сыллааҕы биир кэлим эксээмэн, сүрүн…
Арассыыйа тимир суоллара (АТС) Кытайы уонна КНДР-ы кытта пассажирдары тиэйиини сөргүтэллэр. Бу туһунан АТС пресс-сулууспата…
Бүгүн СӨ Бырабыыталыстыбатын 2 дьиэтигэр "Конституция -- Арассыыйа быраапка тирэҕэ: Саха сирин аныгы быыбардыыр тиһигин…
«Арассыыйа – мин устуоруйам» историческай пааркаҕа «Кино в службе Отечества» бэстибээл чэрчитинэн «Дьиэбэр барабын» киинэни…
Балбахов Виссарион Дмитриевич, үйэ чиэппэрэ кэм устата Хоту сиргэ таһаҕаһы таһыыга эҥкилэ суох үлэлээбит Арассыыйа Федерациятын…