Любовь Уарова: «Саха сирин эрэлэ» наҕарааданы тутан олус долгуйдум»

Бүгүн Саха тылын, литературатын уонна култууратын учууталларын 3-с өрөспүүбүлүкэтээҕи сийиэһин иккис күнэ. Сийиэс кыттыылаахтара араас куурустарга, маастар-кылаастарга, төгүрүк остуолларга, о.д.а. тэрээһиннэргэ кытталлар.

Сийиэскэ «Саха сирин эрэлэ» бэлиэнэн наҕараадаламмыт, Сунтаар улууһун Павел Васильевич, Семен Васильевич Кырбасовтар ааттарынан Аллыҥа уопсай үөрэхтээһинин орто оскуолатыгар саха тылын, литэрэтиирэтин учууталынан үлэлиир Любовь Уарова сийиэс туһунан санаатын үллэстэр:
— Мин Сунтаар улууһун Павел Васильевич, Семен Васильевич Кырбасовтар ааттарынан Аллыҥа уопсай үөрэхтээһинин орто оскуолатыгар саха тылын, литэрэтиирэтин учууталынан, ону таһынан, оҕо саас сирдьитинэн (советник директора по воспитанию и взаимодействию с ДОО) үлэлиибин. Бу сийиэскэ Сунтаар улууһун Аллыҥа диэн нэһилиэгиттэн икки буолан кыттыыны ыла сылдьабыт. Мин уонна Надежда Станиславовна Иванова диэн түөрт оҕолоох ийэ. Бэйэтэ эмиэ олус киэҥ толкуйдаах, оҕолорун сахалыы иитэр, төрүт үгэстэри үөрэтэр араас бырайыак ааптара. Сийиэскэ бастакытын кыттыыны ыллым. Тэрээһин өттүнэн олус үчүгэй, ымпыгар-чымпыгар тиийэ толкуйдаммыт. Сыыппара эйгэтэ төрөөбүт тылынан үөрэтиигэ көмөтө диэн секцияҕа кыттыыны ылыахтаахпын. Бэҕэһээ үөрэҕирии миниистирэ Нюргуна Соколова «Саха сирин эрэлэ» («Надежда Якутии») наҕараада туттарбыта олус долгутуулаах этэ. Сүрүн мунньахха араас салайааччылары кытары кэпсэтии быһыытынан барбытын олус сэргээбитим. Чаас тиийбэтин, оҕо сахалыы саҥарбат буолуутун кыһалҕаларын көтөхпүттэрэ. Саҥа учебниктар оҥоһулла сылдьалларын Феодосия Габышева ахтан аһарбыта. Бу сийиэскэ кыттаммын элбэҕи биллим-көрдүм, биир идэлээхтэрим уопуттарын иһитттим, олус туһалаах буолла.