«Манчаары оонньуулара»: таатталар 800 олбох тигиэхтэрэ

«Манчаары оонньуулара» XXII  спартакиада ыалдьыттарыгар анаан Таатта улууһун Ытык-Күөл сэлиэнньэтин олохтоохторо 800 устуука олбох тигэргэ туруннулар.

Ытык-Күөл бэтэрээннэрин Сэбиэтэ 200 устууканы тигэргэ былаанныыр.  «Сарыал» култуурунай кииҥҥэ иистэнньэҥ эбээлэр, эдэр ийэлэр мустан олбох тигиитин ньымаларыгар үөрэннилэр. Нэһилиэк дьаһалтата олбох матырыйаалын атыылаһыыга үбүнэн-харчынан хааччыйда.

Тэрийээччилэр бу күүстээх үлэни ситиһэргэ 100 миэтэрэ уһуннаах таҥас матырыйаалын атыыластылар. Екатерина Бурнашева салайааччылаах «Айылҕаана» эбээлэр түмсүүлэрэ таҥастарын өтүүктээн, миэркэлэри ылан, быһан номнуо саҕалаатылар. Эбээлэр олбох тигиитин муус устар ыйга бүтэрэр былааннаахтар диэн Тааттааҕы култуура уонна успуорт сайдыытын киинэ иһитиннэрэр.

Санатан эттэххэ, Ил Дархан Айсен Николаев дьаһалынан «Манчаары оонньуулара» успуорт национальнай көрүҥнэригэр спартакиада 2025 сыл от ыйыгар Таатта улууһугар ыытыллыаҕа.

Дойду Бэрэсидьиэнэ Владимир Путин бэлиэтээбитинэн, Арассыыйа национальнай успуорт көрүҥнэрин тарҕатыыга уонна  маассабай успуорт көрүҥнэрин сайыннарыыга үлэлиир.