Массыынаҕа баҕана түһэн суут «Якутскэнергоҕа» хоромньу толуйтарда

2024 сыл ыам ыйыгар Табаҕа сэлиэнньэтигэр уот ситимин баҕаната дьиэ таһыгар турбут массыынаҕа сууллубут, ол түмүгэр күрүө эмиэ алдьаммыт. Сууллуу түмүгэр «Toyota Passo» массыына алдьаммыт. Сыаналааһын түмүгүнэн массыынаҕа таһаарыллыбыт хоромньу ырыынак сыанатынан 165200 солкуобайга тэҥнэспит, онтон күрүөнү чөлүгэр түһэрии сыаната 7498 солкуобай буолбут. Бу туһунан СӨ Үрдүкү суутун пресс-сулууспата иһитиннэрэр.

Эмсэҕэлээччи Дьокуускай куорат уокуругун дьаһалтатыттан, «Горсвет» МУП-ка хоромньуну төлөтөргө Дьокуускай куорат суутугар үҥсүбүт. Суут дьыаланы көрүү кэмигэр хоруйдааччы быһыытынан «Якутскэнерго» ААУо, «Дьокуускай куорат» уокуругун Олох-дьаһах  хомунаалынай хаһаайыстыбатын уонна энергетикатын департаменын управлениетын эппиэккэ тардыбыт.

Эппиэттээчилэр ирдэбилгэ сөбүлэспэттэрин биллэрэн, толорортон аккаастыырга көрдөспүттэр.

Суут быһаарбытынан, ирдэһээччи массыынатыгар уот ситимин баҕаната сууллубут, ол түмүгэр массыына механическай алдьаныыны ылбыт. Ону таһынан суут быһаарбытынан, бу уот ситимин баҕаната муниципальнай бас билиитэ буолбатах эбит. Уот ситимэ «Якутскэнерго» ААУо хаһаайыстыбатын сорҕото буолара, ону туһанан электроэнергияны биэриигэ өҥөнү оҥороро уонна туһааннаах төлөбүрү ылара быһаарыллыбыт.

Бастакы инстанция суута, ирдэбили толорон, хоруйдааччы «Якутскэнерго» ААУо уотунан хааччыйыыга тиһиги оҥорор территориальнай ситим тэрилтэтин быһыытынан, Арассыыйа Федерациятын Энергетика министиэристибэтин 2022 сыл атырдьах ыйын 12 күнүнээҕи 811 №-дээх бирикээһинэн бигэргэтиллибит уот энергиятын туһанааччылар электроустановкаларын тэхиньиичэскэй үлэлиир ирдэбиллэрин, ону таһынан Арассыыйа Федерациятын Энергетика министиэристибэтин 2022 сыл алтынньы 4 күнүнээҕи 1070 №-дээх бирикээһинэн бигэргэтиллибит ирдэбиллэригэр сөп түбэһиннэрэн, техническэй хааччыйыыны оҥорорго уонна өрөмүөннээһин, чөлүгэр түһэрии эбээһинэһин толорорго булгуччулаах диэн ыйбыт.

Дьокуускай куорат суутун быһаарыытынан «Якутскэнерго» ААУо тэрилтэттэн 172698 солкуобай суумаҕа хоромньу, сыанабылы төлөөһүн ороскуота – 4500 солкуобай, бэрэстэбиитэл өҥөтүн төлөөһүн ороскуота 20000 солкуобай, ону таһынан судаарыстыба туһатыгар төлөбүр ороскуота 6046 солкуобай ирдэһиллибит.

Дьокуускай куорат дьаһалтатыгар, «Горсвет» МУП-ка, куорат уокуругун Олорор дьиэ-коммунальнай хаһаайыстыба уонна энергетика департаменын управлениетыгар кииирбит ирдэбил тохтотуллубут. Ол оннугар эппиэттээх «Якутскэнерго» ААУо сүктэриллибит. «Якутскэнерго» маннык быһаарыыны кытта сөбүлэспэккэ, Саха Өрөспүүбүлүкэтин Үрдүкү Суутугар үҥсүбүт. Энергетиктэр баҕана сууллар кэмигэр муниципальнай бас билиигэ баар диэн турууласпыттар.

Суут гражданскай дьыалаларга кэллиэгийэтэ, дьыала матырыйаалларын көрөн баран, бастакы инстанция суутун быһаарыытын уларыппакка хаалларда. Суут быһаарыыта сокуоннай күүһүгэр киирдэ.