Суруналыыстар сахалыы дьыктаан суруйан, билиилэрин тургутан көрдүлэр

Бүгүн, олунньу 11 күнүгэр “Сахабэчээт” медиа-хампаанньа үлэһиттэрэ Төрөөбүт тыл уонна сурук-бичик күнүн  көрсө  сахалыы дьыктаан суруйдулар.

“Саха сирэ” хаһыат үгэс курдук ыытан кэлбит тэрээһинигэр Саха сирин норуодунай суруйааччыта Софрон Данилов “Оҕо саас туманнаах сарсыардата” айымньытыттан дьыктааны хаһыат суруналыыһа Людмила Попова аахта.

Дьыктаан суруйуутугар ылсыах иннинэ “Саха сирэ” хаһыат эрэдээктэрин солбуйааччы Анивера Акимова:

“Сахалыы тыллаах хаһыат үлэһиттэрэ сыл ахсын маннык дьыктаан суруйабыт. Киһи дьиктиргиирэ уонна кэрэхсиирэ диэн, бухгалтериябыт үлэһиттэрэ сахалыы таба суруйан, бириистээх миэстэлэргэ тиксээччилэр. Холобур, биир  сылга бастакы миэстэни экэнэмиис идэлээх Лена Егорова ылан турар. Онон бүгүн даҕаны түмүк эмиэ интэриэһинэй, соһуччу  буолуон сөп. Дьыктааны бэйэбит суруналыыстарбыт эрэ буолбакка, “Айыы кыһатын” учуутала кэлэн аахпыт түгэнэ эмиэ баара.  Быйыл “Сахабэчээт” идэлээх сойууһа харчынан бириэмийэлэри туруорда”, — диэн биир идэлээхтэрин билиилэрин-көрүүлэрин өссө тургутан көрөллөрүгэр ыҥырда.

Бэриллибит тиэкиһи суруналыыстар, суруйааччылар, атын эйгэ үлэһиттэрэ  ыарырҕаппакка суруйдулар эрээри,  элбэх мунаардар уонна мөккүөрдээх да сурук бэлиэлэрэ (ол иһигэр,  урукку быраабыланан)  бааллара дьыктаан суруйааччылары        “ууга-уокка” түһэрэн ылла.

Түмүккэ “Чолбон” сурунаал корректора  Анна Прудецкая кыайыылаах тахсан, I Үрдэли ылла уонна  Добун суругунан наҕараадаланна.  II Үрдэлгэ Ангелина Васильева (“Саха сирэ”),  III Үрдэлгэ Женни Стрюкова (“Саха сирэ”) тахсаннар, Добун сурук туһааннаахтарынан буоллулар. Ону сэргэ Биһирэбил бириис эмиэ туһааннаахтарын булла.

Суруналыыстар, төһө да күн аайы суруйар-бичийэр, айар үлэлээхтэрин иһин, Төрөөбүт тыл уонна сурук-бичик күнүгэр маннык дьыктааны суруйан, бэйэлэрин тургутан көрөллөрүн олус сөбүлүүллэр.