«MAX» мессенджери төлөпүөҥҥэ хайдах түргэнник туруорабыт

Кэнники кэмҥэ Саха сирин олохтоохторун ортотугар «MAX» диэн саҥа мессенджер киэҥник тарҕанна. Мобильнай сыһыарыы суругунан кэпсэтиини, видео сибээһи, сонуннаах ханааллары, араас туһалаах мини-сыһыарыылары уонна төлөбүрү оҥорор кыаҕы барытын бииргэ холбуур. Ол эрээри, үгүс дьон бу мессенджери хайдах хачайдыыры уонна туруорары ситэ билбэт.

Саҥа технологиялар үйэлэригэр олох тэтимиттэн хаалбат туһугар, хас биирдиибитигэр табыгастаах сибээс ньымата наада. «MAX» мессенджер Саха сирин усулуобуйатыгар, мөлтөх интэриниэккэ даҕаны эрэбиллээхтик үлэлииринэн дьон биһирэбилин ылла.

Хантан хачайдыахха сөбүй?

Бүгүҥҥү күҥҥэ «MAX» мессенджер ханнык баҕарар операционнай систиэмэҕэ (Android, iPhone) уонна төлөпүөн моделларыгар үлэлиир. Ону таһынан, көмпүүтэргэ туруорунар кыах эмиэ баар.

• Android төлөпүөннээх дьон: RuStore, Google Play эбэтэр AppGallery маҕаһыыннартан хачайдыаххытын сөп. RuStore — бу Арассыыйа оҥорон таһаарбыт сыһыарыыларын маҕаһыына, сааҥсыйа кэмигэр ордук эрэбиллээх.
• iPhone (iOS) төлөпүөннээх дьон: App Store нөҥүө хачайдыыгыт.
• Көмпүүтэргэ (Windows, macOS, Linux): Мессенджер официальнай сайтыттан быһаччы хачайдыыгыт.

Төлөпүөҥҥэ туруоруу инструкцията

1. Төлөпүөҥҥүтүгэр сыһыарыы маҕаһыынын (RuStore, Google Play эбэтэр App Store) арыйаҕыт.
2. Көрдүүр устуруокаҕа «MAX мессенджер» диэн суруйаҕыт уонна көрдүүр бэлиэни  баттыыгыт.
3. Тахсыбыт сыһыарыыны булан «Установить» эбэтэр «Скачать» диэн тимэҕи баттыыгыт.  Өскөтүн RuStore нөҥүө туруорар буоллаххытына, ортотугар тахсар түннүккэ туруорууну бигэргэтэргэ көрдөһүө. Онно «Да» эбэтэр «Разрешить» диэни баттыахтааххыт.
4. Сыһыарыы хачайданан бүппүтүн кэннэ, «Открыть» тимэҕи баттаан, мессенджери үлэлэтэҕит.

Саҥа аккауну регистрациялааһын

Өскөтүн эһиги «MAX»-ка саҥа киирэр буоллаххытына, бэлиэтэниини ааһыахтааххыт. Бу эмиэ судургу:

1. Арыллыбыт сыһыарыыга төлөпүөҥҥүт нүөмэрин киллэрэҕит уонна «Далее»диэни баттыыгыт.
2. Кыратык кэтэһэ түстэххитинэ, киллэрбит нүөмэргитигэр SMS-куод (алта сыыппаралаах) кэлиэҕэ. Бу куоду анал устуруокаҕа суруйаҕыт. (Сорох төлөпүөннэр бэйэлэрэ тутатына киллэрэллэр).
3. Салгыы бэйэҕит ааккытын-суолгутун (кэпсэтэр дьоҥҥут эһигини хайдах көрүөхтээхтэрин) суруйаҕыт.
4. Профильгытыгар хаартыска туруоруоххутун сөп. Ол эрээри, бу булгуччулаах ирдэбил буолбатах, кэлин даҕаны оҥоруохха сөп.
5. «Начать общение» диэн тимэҕи баттаатыгыт да — мессенджеринэн толору туһанар кыахтанаҕыт!

Көрөргүт курдук, «MAX» мессенджери туруоруу уустуга суох. Бу сыһыарыыны туруорунан, чугас дьоҥҥун, доҕотторгун, кэллиэгэлэргин кытта сибээскин өссө түргэн уонна табыгастаах оҥоруоҥ.