Мэдиссиинэ үлэһиттэрин байыастарга көмөлөрө

Өрөспүүбүлүкэтээҕи 2 №-дээх балыыһа-Суһал мэдиссиинискэй киин  байыаннай эпэрээссийэҕэ Саха сириттэн сылдьааччылары өйөөн, 300-тэн тахса тыһыынча солкуобайы хомуйда.

Бүгүн, ыам ыйын 19 күнүгэр, Өрөспүүбүлүкэтээҕи 2 №-дээх балыыһа кылаабынай бырааһын эбээһинэһин толорооччу Леонид Алексеевич Слепцов хомуллубут үбү “Донбасска көмөлөһөр уонна өйүүр  Хотугулуу-Илиҥҥи пуонда”  бэрэстэбиитэлэ Иннокентий Мирович Егоровка туттарда.

Суһал мэдиссиинискэй көмө киинин исписэлиистэрэ  байыаннай эпэрээссийэҕэ хомуурга уонна баҕа өттүнэн барбыттарга салгыы көмөлөһөллөрө кэрэхсэбиллээх. Тоҕо диэтэххэ, кинилэр  биир дойдулаахтарыгар көмө, тирэх буолар наадатын олус өйдүүллэр.

Санатан эттэххэ, балыыһа  мэдиссиинискэй үлэһиттэрэ урут эмиэ үбүнэн уонна мал-сал өттүнэн көмөнү оҥорбуттара – быйыл тохсунньу бүтүүтэ баһыылкалары ыыппыттара.

“Билигин “Донбасска көмөлөһөр уонна өйүүр  Хотугулуу-Илиҥҥи пуонда” Саха сириттэн хомуурга барбыт дьоҥҥо көмөнү салгыы хомуйар. Байыаннай эпэрээссийэҕэ кытта сылдьар биир дойдулаахтарбытын өйүөҕүҥ”, — диэн балыыһа үлэһиттэрэ ыҥыраллар.

 (СӨ Доруобуйа харыстабылын министиэристибэтин матырыйаалынан)