Саха кыыһа «Мисс Вселенная — 2025» күрэх финалыгар таҕыста

Сэтинньи 21 күнүгэр, бээтинсэҕэ, Таилаҥҥа «Мисс Вселенная — 2025» норуоттар икки ардыларынааҕы Кэрэ куо күрэҕин финала буолуоҕа. Саха кыыһа Елена Егорова Сербия аатыттан сүрүн хоруона иһин киирсиэҕэ.

Бу иннинэ Арассыыйа уонна Сербия икки дойду гражданстволаах Елена урут Кэрэ куо күрэхтэригэр талааннарын көрдөрбүтэ. Кыыс «Мисс Монголия Гранд — 2022» уонна «Саха сирин Хаар Кыыһа — 2018» титулларын ылбыта.

«Мисс Вселенная» күрэҕин хас да түһүмэҕэ номнуо ааста. Кыттааччылар икки күн устата омук таҥастарын көрдөрдүлэр.

«„Мисс Вселенная“ күрэххэ Сербияны билиһиннэрии — олохпор биир саамай улахан чиэс. Бэйэни билинии, биир сомоҕо буолуу уонна киэн туттуу бэлиэтэ буолар. Сербия гражданствотын быраабын ыларга, сыллар тухары бэриниилээх буолуу, таптал уонна тулуур ирдэннэ. Бу кэрэ дойдуга баай култууратын, үтүө санаалаах дьонун уонна уҕараабат тыынын иһин муҥура суох махтанабын. Сербия миигин күүс, сомоҕолоһуу уонна нарын буолуу суолтатыгар үөрэттэ, онон мин иккис дьиэм диэн киэн тутта ааттыыбын», — диэн Елена социальнай ситимнэргэ суруйбут.

«Мисс Вселенная — 2025» күрэххэ Арассыыйаны Анастасия Венза билиһиннэрэр. Сүрүн титулу уонна хоруонаны саҥа Кэрэ куо королеватыгар билиҥҥи титул хаһаайката Данияттан сылдьар Виктория Тейлвиг туттарыаҕа.