Хаартыска: Чокуур Гаврильев, Юрий Егоров, Ньургуйаана Аргунова
Сэтинньи 3 күнүгэр, Норуот сомоҕолоһуутун бырааһынньыгын көрсө, Өрөспүүбүлүкэтээҕи лиссиэй-интэринээт уонна Модут орто оскуолатын үөрэнээччилэрэ, төрөппүттэрэ муҥхалаатылар. Муҥханы быйыл сөргүтүллэн тэриллибит Өрөспүүбүлүкэтээҕи лиссиэй-интэринээтин Аҕа түмсүүтэ көҕүлээн ыытта.
Нам улууһун ыалдьытымсах Модут нэһилиэгин дьоно-сэргэтэ, оскуола учууталлара уонна төрөппүттэрэ ыалдьыттары хара сарсыардаттан үөрэ-көтө көрүстүлэр. Үөрүүлээх быһыыга-майгыга РЛИ аҕаларын салайааччыта, Саха Өрөспүүбүлүкэтин Аҕаларын Лигатын бэрэссэдээтэлэ Айхал Габышев Модут орто оскуолатын дириэктэригэр Иван Тихоновка Аҕа оруолун үрдэтиигэ кылаатын иһин мэтээли туттарда. Муҥха хаһаайыныгар Василий Сыроватскайга сыаналаах сэртипикээт бэлэх ууннулар.
Үөдэйдээҕи Сарыал сынньалаҥ киинин худруга, эдэр алгысчыт Геннадий Игнатьев ыыппыт сиэрин-туомун кэнниттэн, олохтоохтор ыйыыларынан-кэрдиилэринэн муҥханы түһэрдилэр. Оҕолор көрөн турбакка, тутан-хабан, ким анньыылаан, ким үтүмэх ыытан, ким нырыылаан, ким муҥханы сосуһан элбэххэ үөрэннилэр. Саха төрүт үгэһин, мындыр толкуйун эттэринэн-хааннарынан биллилэр.
Эбиэккэ ийэлэр түөрт араас күөс өрөн көрсөн, барыта аҕыс уонтан тахса муҥхаһыты сылаас миининэн күндүлээтилэр. Улахан эбэҕэ иккистээн төхтүрүйэн түһэриигэ, икки өттүттэн тэҥҥэ нырыылаан, муҥханы балайда уһуннук состулар. Халлаан хараҥарыыта Күөх Боллох үтүө бэлэҕин тутан, үөрэн-көтөн тарҕастылар. “Дьиҥнээх саха буоллум!», — диир оҕолор бааллар. Кэнчээри ыччаппыт өттүк харалаах, илии тутуурдаах дьиэлэригэр тиийэн, төрөппүттэрин, учууталларын күндүлээтэ.
Санатан эттэххэ, Альберт Соров салайар Өрөспүүбүлүкэтээҕи лиссиэйбит бастакы Аҕа түмсүүтэ 2017-2018 cc. Модукка эмиэ муҥханы тэрийэн турар. Үтүө үгэс ситимэ быстыбакка, салҕанан эрэриттэн үөрэх кыһатын төрөппүттэрэ олус астыналлар. Модут нэһилиэгэр, оскуолатыгар, үтүө үлэһит дьонугар-сэргэтигэр барҕа махтал тылларын тиэрдэллэр. Маннык тэрээһин кэнэҕэскигэ салгыы буола туралларыгар баҕа санааларын этэллэр.
Чокуур Гаврильев
Дьокуускай куорат борокуратуурата киин куорат икки олохтооҕун туһунан судаарыстыбаннай буруйдааһыны өйөөтө. Кинилэр РФ ХК 126-с…
Бүгүн, ахсынньы 20 күнүгэр, Дьокуускай куоракка өрөспүүбүлүкэ бары муниципальнай оройуоннарыттан уонна куорат уокуруктарыттан 8-11 кылаас…
Дойдутааҕы МАХ мессенджергэ 75 мөлүйүөн туһанааччы бэлиэтэннэ. Платформа пресс-сулууспата иһитиннэрбитинэн, ахсынньыга сервиһи ортотунан суукка аайы…
Саҥа дьыллааҕы бырааһынньыктар иннинэ түөкүттэр былаас аатыттан сымыйа төлөбүрдэринэн уонна «бэлэхтэринэн» албынныыр ньыманы көхтөөхтүк туһанан…
Ахсынньы 20 күнүгэр Дьокуускайга «Спортивнай» түөлбэҕэ элбэх хайысхалаах успуорт саалатын үөрүүлээх аһыллыыта буолла. СӨ Ил…
Ахсынньы ыйыгар Саха сиригэр кыһыҥҥы суоллар аһыллыбыттарын үрдүнэн, улуустар икки ардыларынааҕы таксыы сыанатыгар биллэр-көстөр чэпчэтии…