Муниципальнай тэриллиилэр сэбиэттэрин IX сийиэһэ ыытыллыа

Кулун тутар 27-31 күннэригэр Дьокуускайга олохтоох салайыныы баһылыктара уонна дьокутааттара икки сийиэскэ түмсүөхтэрэ.

Ол курдук Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын дьокутааттарын II сийиэһэ уонна Саха Өрөспүүбүлүкэтин муниципальнай тэриллиилэрин сэбиэтин – Муниципалитеттар икки ардыларынааҕы бииргэ үлэлээһин ассоциациятын IX сийиэһэ ыытыллыахтара.
IX сийиэс дэлэгээттэринэн, муниципальнай оройуоннар уонна куораттааҕы уокуруктар баһылыктара, куорат уонна тыа сирин бөһүөлэктэрин баһылыктара, муниципальнай тэриллиилэр уорганнарын бэрэстэбиитэллэрэ уонна муниципальнай тэриллиилэр хонтуруоллуур-ааҕар уорганнарын бэрэссэдээтэллэрэ буолаллар.

Сийиэс бастакы күнүгэр муниципальнай тэриллиилэр баһылыктарын кытта Биир кэлим координационнай киин сүбэ мунньаҕа ыытыллыа. Ол кэннэ Инновационнай менеджмент үрдүкү оскуолатыгар сэминээрдэр, сиэссийэлэр буолуохтара.

Иккис күн дэлэгээттэр Ил Түмэн сис кэмитиэттэрэ ыытар «СӨ олохтоох салайыныы суолталаах боппуруостара», «СӨ экология, сири туһаныы, тыа хаһаайыстыбатын, Аартика зонатын, олох-дьаһах хаһаайыстыбата уонна энергетика боппуруостара», «Үөрэх, култуура, наука, дьиэ кэргэн уонна оҕо, патриотическай иитии боппуруостара» тиэмэлэргэ төгүрүк остуолларга кыттыахтара.

Үһүс күн муниципальнай тэриллиилэр бэрэстэбиитэллээх уорганнарын дьокутааттарын II сийиэһин пленарнай мунньаҕа ыытыллыа. Ол кэнниттэн СӨ Ил Дархана Айсен Николаев улуустар зоналарынан (оройуоннарын) бөлөхтөрүн баһылыктарын кытта тус-туспа көрсөн мунньахтыа.
Саха Өрөспүүбүлүкэтин муниципальнай тэриллиилэрин Сэбиэтин – Муниципалитеттар икки ардыларынааҕы бииргэ үлэлээһин ассоциациятын Бырабылыанньатын саҥа састааба итиэннэ Хонтуруоллуур хамыыһыйатын саҥа састааптара мунньахтыахтара.

Сийиэс дэлэгээттэрэ олохтоох салайыныы сүрүн боппуруостарын төгүрүк остуол тула дьүүллэһиэхтэрэ. Ол кэннэ Саха АССР Үрдүкү Сэбиэтин XII ыҥырыытын дьокутаата, СӨ Ил Түмэн III-IV ыҥырыытын дьокутаата, Булуҥ улууһун, Өспөх нэһилиэгин, Алдан оройуонун Бөллөө эбэҥки национальнай нэһилиэгин Бочуоттаах гаржданина Дмитрий Николаевич Горохов төрөөбүтэ 75 сылыгар уопсастыбаннас үөрүүлээх мунньаҕар кыттыахтара. «Ньургун Боотур» операҕа сылдьан дуоһуйа сынньаныахтара.

Бүтэһик күнү СӨ Счетнай палаататын иһинэн хонтуруоллуур-суоттуур уорганнар сэбиэттэрин уонна СӨ муниципальнай хонтуруоллуур-суоттуур уорганнарын кэмпэриэнсийэтэ уонна Эдэр баһылыктар сэбиэттэрин мунньаҕа, Духуобунай сиэр-майгы сыаннастарын бөҕөргөтүү мунньаҕа түмүктүөҕэ.