«МУУС УСТАР» бэстибээл бэлиэтин таллылар

«МУУС УСТАР» V Өрөспүүбүлүкэтээҕи ыччат бэстибээлин бэлиэтигэр куоластааһын түмүктэннэ.

Барыта 8,6 тыһ. Саха сирин олохтооҕо кытынна.

“Бүтэһик түгэнҥэ диэри икки бэлиэ икки ардыгар тэбис тэҥ киирсии бара турбута, ол да буоллар кыайыыны «Кэскил» ылла. ВКонтакте уонна Одноклассники бэстибээл страницаларыгар ыытыллыбыт куоластааһын түмүгүнэн «Кэскил» кыайда. Кини туһугар 3176 куолас бэрилиннэ. «Ньургуһуннар» 3085 куолаһы ыллылар. Барыта 8,6 тыһыынчаттан тахса киһи бэстибээл бэлиэтин талыыга кытынна. Кыайыылааҕы эҕэрдэлиибит уонна куоластааһыҥҥа кыттыбыт дьоҥҥо барыларыгар махтанабыт”, — дииллэр бэстибээл тэрийээччилэрэ.

«Кэскил» диэн аат «инникилээх, кэскиллээх, сайдыыга туһаайыылаах,  үрдүккэ талаһар» өйдөбүллээх. Бу аат МУУС УСТАР бэстибээл кыттыылаахтара куруук үрдүккэ талаһалларын, салгыы сайдалларын туһугар талыллыбыта.

Санатан эттэххэ, кулун тутар 17 күнүгэр Дьокуускай «МУУС УСТАР» ыччат бэстибээлин кыттыылаахтарын көрсүөҕэ. Түмүктүүр тэрээһин кулун тутар 22 күнүгэр «Триумф» кииҥҥэ буолуоҕа. Тэрээһин араас хайысхаларга өрөспүүбүлүкэ эдэр талааннаахтарын буларга, өйүүргэ, өрө тутарга туһуланар, диэн иһитиннэрэр Ил Дархан, бырабыыталыстыба пресс-сулууспата.