Нам улууһугар кусчуттар күрэхтэрэ булчуттары кэрэхсэттэ

Бу күннэргэ эр дьоҥҥо саамай күүтүүлээх кэм — булт сезонун үгэнэ. 

Сотору кэминэн Улуу Кыайыы күнүгэр ытык кырдьаҕастарбытыгар нэһилиэк аайы бастакы куһу амсатан үөрдүөхтэрэ. Улуустарга сааскы булка сыһыаннаах араас тэрээһиннэр буола тураллар. Биир маннык кэрэхсэбиллээх — Нам улууһун кусчуттарыгар ыытыллыбыт булт күрэҕин туһунан суруналыыс Ньургуйаана Романова кэпсээтэ:

— Улууска сааскы кусчуттарга маҥнайгы улуустааҕы күрэх ыытылынна. Тэрээһин  бэрт тыҥааһыннаах буолла. Бастакы көҕөнү ытаары араас нэһилиэктэн мэҥиэ кустаах 60 киһи кытынна. Ол эрээри, күрэх балаһыанньатынан көҕөнү таһынан, эбии чөккөйү ытан ылбыт киһи кыайыылаах тахсыахтаах. Кыайыылааҕы быһаарыы эр бэрдэрэ куһу ытан ылбыт бириэмэлэринэн бигэргэннэ.

Күрэх түмүгүнэн икки куһу бастакынан ытан ылбыт Антон Попов кыайыылааҕынан таҕыста. Киниэхэ булчуттар көһө сылдьар Кубоктарын уонна туртаска лицензия туттардылар.

Хаартыскаҕа Антон Попов ортоку турар. 

Булчут Юрий Сивцев хас да көрүҥүнэн «саҥаран» куһу бэйэтигэр тардар үс мэҥиэ куһунан кытынна. 

Уопсайа алта байанайдаах кусчут бириистээх миэстэҕэ тиксэн, илии тутаардаах, өттүк харалаах тарҕастылар.

Суруналыыс бу сонунугар эбии «Саха» НКИХ  биэриитигэр бэйэтэ бэлэмнээн оҥорбут матырыйаалын ыытта.