Намҥа байыаннай дьайыы бэтэрээннэригэр корнхолга турнир ыытылынна

Нам сэлиэнньэтин Уопсастыбанньыктар дьиэлэригэр бойобуой дьайыылар бэтэрээннэрин икки ардыларыгар корнхолга бастакы турнир ыытылынна.

«Тохсунньу томороон тымныыларыгар турнир сылаас уонна доҕордуу эйгэҕэ буолан ааста. Оонньуу усулуобуйатын кыттааччыларга киин дириэктэрэ Иван Яковлев быһааран көрдөрдө, оттон күрэхтэһии судьуйатынан киин исписэлииһэ Харысхан Попов үлэлээтэ», — диэн «Аҕа дойдуну көмүскээччилэр» судаарыстыбаннай пуонда филиалыгар иһитиннэрдилэр.

Күрэхтэһии түмүгүнэн Прокопий Саввинов кыайыылааҕынан буолла. Бочуоттаах иккис миэстэни Гаврил Сергучев, үсүһү — Игнат Никулин ыллылар. Турнир бары кыттааччылара «Буойун» КТТ уонна Нам улууһун Ленскэй нэһилиэгин дьаһалтата туруорбут грамоталарынан, мэтээллэринэн уонна бириистэринэн наҕараадаланнылар.

Турнир Ленскэй нэһилиэгин уонна «Лидер» успуорт киинин көҕүлээһининэн, «Аҕа дойдуну көмүскээччилэр» пуонда Намнааҕы филиалын социальнай координатордарын өйөбүлүнэн тэрилиннэ. Тэрийээччилэр бэлиэтээбиттэринэн, кэлэр сылга бойобуой дьайыылар бэтэрээннэригэр, байыаннай дьайыы кыттыылаахтарыгар уонна кинилэр дьиэ кэргэттэригэр анаан хас да турниры ыытыы былааннанар. Маннык тэрээһиннэр байыаннай сулууспалаахтарга табаарыстыба тыына бөҕөргүүрүгэр, патриотическай иитиигэ уонна уопсастыбаҕа бэйэ-бэйэҕэ көмөлөһүүнү сайыннарыыга көмөлөһөллөр.