Намҥа «Сыл устудьуона» национальнай бириэмийэ эрэгийиэннээҕи түһүмэҕэ саҕаланна

Бүгүн, алтынньы 16 күнүгэр, И.Е. Винокуров аатынан Намнааҕы педагогическай кэллиэскэ профессиональнай үөрэх тэрилтэлэрин ортолоругар «Сыл устудьуона – 2025» Арассыыйатааҕы национальнай бириэмийэ эрэгийиэннээҕи түһүмэҕин үөрүүлээх аһыллыыта буолла. Бу туһунан sakha.gov.ru иһитиннэрэр.

Куонкурус сыала – талааннаах устудьуон ыччаты булуу уонна өйөөһүн, ону таһынан кинилэр социальнай, интеллектуальнай уонна айар көхтөрүн сайыннарыы. Тэрээһиҥҥэ эҕэрдэ тылы И.Е. Винокуров аатынан кэллиэс дириэктэрэ Елена Никитина уонна Арассыыйатааҕы ыччат Сойууһун эрэгийиэннээҕи салаатын бэрэссэдээтэлэ Алексей Данилов эттилэр. Бүгүн «Сыл түмэт үлэһитэ», «Сыл күрэсчитэ», «Сыл идэлээҕэ», «Сыл доброволеһа», «Сыл патриота», «Сыл үөрэнээччилэрин сэбиэтин бэрэссэдээтэлэ», «Сыл айар талааннааҕа», «Сыл старостата», «Сыл медиата» биирдиилээн номинацияларга уонна «Сыл устудьуоннарын кулууба», «Сыл доброволецтарын түмсүүтэ», «Сыл устудьуоннарын медиата», «Сыл патриотическай түмсүүтэ», «Сыл айар кулууба» бөлөҕүнэн номинацияларга бастакы куонкурус тургутуулара саҕаланнылар.

«Сыл устудьуона»  национальнай бириэмийэ эрэгийиэннээҕи түһүмэҕэр өрөспүүбүлүкэ 22 профессиональнай үөрэҕин тэрилтэтиттэн 216 устудьуон кыттыыны ылар. Эрэгийиэннээҕи түһүмэҕи СӨ Үөрэҕин уонна билимин министиэристибэтэ, СӨ Профессиональнай үөрэхтээһини сайыннарар института, И.Е. Винокуров аатынан Намнааҕы педагогическай кэллиэс уонна Арассыыйатааҕы ыччат сойууһун эрэгийиэннээҕи салаата тэрийэн ыыталлар.