Наталия Бурцева: «Төрөппүтү кытта биир өйүнэн-санаанан үлэлээтэхпитинэ»

Саха тылын учууталларын сийиэһигэр Уус Алдантан 20 дэлэгээт уонна икки ыҥырыылаах ыалдьыт кытта сылдьабыт.

Бу улахан далааһыннаах тэрээһиҥҥэ аһаҕас кэпсэтиини сэргээтим. Спикердэр ыйытыыларга хоруйдара болҕомтобутун тарта. Ордук Жирков А.Н., Габышева Ф.В., Пухов М.П. этиилэрин сэҥээрдим. Александр Николаевич саха тылын учууталын статуһун үрдэтии, Феодосия Васильевна 2026-2027 сс. тахсар саха тылын саҥа учуобунньуктарын, Михаил Петрович саха тылын үөрэтии оскуола дириэктэрин, дьаһалтатын ытык иэһэ, эппиэтинэһэ буоларын туһунан этиилэрин биһирээтим. Тэрээһини Кузьмина А.Н. (Чурапчы) «Көтүөххэ хотойдуу үрдүктүк» бырайыагын уолаттара дорҕоонноохтук аахпыт уус-уран дьүһүйүүлэрэ киэргэттэ.  Сыралаах үлэлэрэ сыаналаммыт биир идэлээхтэрбин В.И. Тищенконы, А.Н. Васильевы киэн тутттан туран эҕэрдэлиибин. Маннык улахан түмсүү учууталы эппиэтинэскэ, айымньылаах үлэҕэ кынаттыыр.

Билиҥҥи кэммит уратыта диэн оҕолорбут кыра эрдэхтэриттэн нууччалыы саҥарар, кэпсэтэр буоллулар. Оҕону ийэ тылга умсугутуу, мин санаабар, дьиэ кэргэнтэн саҕаланар. Онон төрөппүтү кытта биир өйүнэн-санаанан үлэлиэхпитин наада. Оҕо төрөөбүт тылынан саҥарар эйгэтин тэрийиигэ сахалыы кинигэни кэрэхсээһин, ааҕыы сүрүн суолталаах. Билиҥҥи оҕо сэҥээрбит кинигэтин эрэ ааҕар. Онон оҕо баҕаран туран ааҕар кинигэлэрин оҥорор сорук турар. Холобур, ХИФУ ХИНТуоКҮ саха литературатын кафедратын сэбиэдиссэйэ Семенова Валентина Григорьевна салалтатынан «Уран сурук эйгэтигэр умсугутуулаах айан» диэн ойуулаах ыйынньыгы (справочнигы) оҥорор бырайыакка университет, академическай билим уонна оскуола үлэһиттэрэ олус кыһаллан үлэлии сылдьабыт. Сахабыт литературатын билиҥҥи оҕо, ыччат сэҥээрэрин, чугастык ылынарын курдук инфографика, комикс, кюар-код, оҥоһуу өй уо.д.а. ньымалары туһанан сонуннук тиэрдэр соруктаахпыт. Бэлэмнээбит матырыйаалбыт элбэх, онон үп-харчы көрүллэрэ буоллар, кинигэбит иккис чааһын оҥорор былааннаахпыт.

Тумус туттар биир дойдулаахпыт А.Н.Жирков Уус Алдан дэлэгээттэрин анаан көрүстэ. Александр Николаевич саха тылын, литературатын учууталларын маҥнайгы сийиэһин көҕүлээн тэрийбит үтүөлээх. Хас биирдии дэлэгээти кытта сахалыы сиэринэн илии тутуһан эҕэрдэлээтэ, үлэлэрин-хамнастарын ыйытта. Сийиэс үлэтиттэн тугу күүтэрбитин, тугу сэҥээрбиппитин иһиттэ. Александр Николаевич дэлэгээттэргэ айымньылаах үлэни, дьулууру баҕарда уонна буруолуу сылдьар саҥа кинигэлэри бэлэх уунна. Убаастыыр салайааччыбытыгар Александр Николаевичка болҕомтоҥ, өйөбүлүҥ иһин барҕа махталбытын тиэрдэбит.

Наталия Бурцева,

«Уолан» гимназия, Уус Алдан.

Хаартыска Н.Бурцева тиксэриитэ