Нерюнгри оройуонугар сүппүт эр киһи өлүгүн буллулар

Нерюнгри оройуонугар «Нахот» бааза аттыгар ыам ыйын 7 күнүттэн сураҕа суох сүппүт эр киһи өлүгүн буллулар.

Санаттахха, Нерюнгри оройуонугар ыам ыйын 9 күнүгэр 1:05 чааска «112» нүөмэргэ киһи сүппүтүн туһунан эрийэн иһитиннэрбиттэрэ. 1972 с.т. эр киһи кэргэнин кыттан тыаҕа тахсыбыт. «Нахот» баазатын аттыгар ойоҕун массыынаҕа хаалларан баран, бултуу барбыт. Ыйыллыбыт болдьоҕор кэлбэтэх, ойоҕо сарсыарда аҕыс чааска диэри күүппүт.

Ыам ыйын 8 күнүгэр бу сирдэри үчүгэйдик билэр киһи көрдөөбүт да, булбатах. Ыам ыйын 9 күнүгэр эр киһини Нерюнгритааҕы Быыһыыр сулууспа икки быыһааччыта уонна ИДьМ үлэһитэ көрдүү тахсыбыттара.

Эр киһи өлүгүн ыам ыйын 13 күнүгэр Быыһыыр сулууспа үлэһиттэрэ булбуттар уонна чугас дьонугар аҕалбыттар. Сабаҕалааһынынан, булчут үрэххэ түһэн суорума суолламмыт диэн Саха сиринээҕи Быыһыыр сулууспа пресс-сулууспата иһитиннэрэр.