Нерюнгрига 47 саастаах дьахтар баттах «өтүүгүн» уорбут

Нерюнгри оройуонугар полиция отделыгар цифровой уонна бытовой тиэхиникэ маҕаһыынын атыыһыта уоруу тахсыбытын туһунан сайабылыанньа суруйбут. Сайабылыанньалаах быһаарбытынан биллибэт дьахтар баттах «өтүүгүн» уоран тахсыбыт.

Холуобунай ирдэбил үлэһиттэрэ уорбаланааччы лиичинэһин быһаарбыттар. Ол курдук, уорбаланааччы урут уоруу иһин холуобунай эппиэтинэскэ тардыллыбыт 47 саастаах олохтоох дьахтар буолара биллибит.

Саха сиринээҕи ИДьМ пресс-сулууспата иһитиннэрэринэн, маҕаһыыҥҥа сылдьан уорбаланааччы дьахтар 6000 солк. баттах «өтүүгүн» атыылаһыан баҕарбыт, ол эрээри бакыакка кистээн уктубут. Онтон кассаҕа тиийэн, атын табаары төлөөбүт уонна баттах «өтүүгүн» төлөөбөккө уктан тахсыбыт. Холуобунай дьыала тэрилиннэ.