«Николай Якутскайга ыалдьыттыы» тэрээһини сэргээтилэр

И.Н.Барахов аатынан судаарыстыбаннас түмэлин тэрийиитинэн биир дойдулаахпыт,  норуот суруйааччыта Николай Якутскай төрөөбүтэ 117 сылын төрөөбүт нэһилиэгэр Харбалаахха, кини ытык аатыгар сүгүрүйэн араас сэргэх тэрээһиннэринэн бэлиэтээтибит.

Ол курдук суруйааччы түмэлэ урукку култуура дьиэтин саалатыгар көһөрүллэн, экспозицията туруоруллан, дьон-сэргэ көрүүтүгэр «Николай Якутскайга ыалдьыттыы» диэн тэрээһининэн арылынна. Кэлбит дьон Николай Гаврилович тутта сылдьыбыт малларын, хаһан да көрбөтөх рукописьтарын, ааҕааччылар суруктарын көрдүллэр уонна  кини оҕолорун Вилюй, Лена диэн ааттаабытын ис төрүөтүн уонна бу үс Золотаревтар өбүгэлэрин дойдутугар хаан тардыытын күүһүнэн ситимнэрин туһунан сэргээн иһиттилэр. Ол курдук юстиция полковника, ю.н.кандидата Вилюй Николаевич Золотарев орто дойдуттан арахсарыгар өбүгэтин дойдутугар аҕатын таһыгар хараллыан баҕарарын эппитинэн кыыһа Оксана, сиэнэ Ирина төрөппүттэригэр иэстэрин толорон, Харбалаахха аҕалан эһэлэрин Николай Гаврилович аттыгар харайан барбыттара. Вилюй Николаевич мэҥэ тааһыгар кини эппит «Родина там, где покоятся предки» диэн тыллара суруллан тураллар.

Онтон Лена Николаевна билигин да Израильга олорор. Төһө да ыраах олордор Сахатын сирин, аймахтарын, доҕотторун кытары сибээһин быспакка кэпсэтэ олорор. Лена Николаевна Сахатын сирин үрүҥ түүннэрин, ыраас хаарын, нарынтан нарын ньургуһунун өйүттэн- сүрэҕиттэн араарбат. Ол курдук «Якутские белые ночи» диэн хоһоонугар Тимофей Шестаков мелодия суруйан Ньурбатааҕы «Элегия» ансамбыл толорбутун уонна «Подснежник» диэн хоһоонугар Лена Таюрская музыка суруйан ыллыырын тэрээһиҥҥэ кэлбит дьон сэргии иһиттилэр уонна Лена Николаевна хоһоон суруйар эбит диэн сөхтүлэр. Бу хоһооннорунан Лена Николаевна, сирэй эппэтэр даҕаны, хайдахтаах курдук дойдутун ахтарын туойдаҕа.

Тэрээһин иккис чааһыгар «Солотуураптыы суруйуу» диэн аахсыйа  бибилэтиэкэр Р.Николаева көҕүлээһининэн, И.Н.Барахов аатынан судаарыстыбаннас түмэлин ыстаарсай сотруднига Е.Семенова саҥа сүүрээни киллэрэн байытан биэрэн кыттааччылар болҕомтолорун тарта. Маны таһынан биир улахан тэрээһиммитинэн «Алмааһы көрдөөччүлэр» диэн үгэс буолбут хамаанданан билии күрэһин оонньуута буолла.  Кыракый нэһилиэк олохтоохторо биэс хамаанданан кытыннылар. Оонньууга кыттыбыт дьон уонна көрөөччүлэр сүрдээҕин сэргээн «Өссө оонньуоххайыҥ» дэтэлии сырыттылар. Ол курдук, киһи болҕомтотун тардар, интэриэһиргэтэр күрэс буолла. Хамаандалар бары кыттыылаахтара Николай Якутскай «Булчуттар үгэстэрэ» диэн 2023 с . «Айар» кыһа таһаарбыт кинигэтин бэлэх туттулар. Тэрээһини саҕаланыаҕыттан бүтүөр диэри ыраахтан Лена Николаевна социальнай ситиминэн долгуйан ахан көрө олордо. Аҕатын аатын үйэтитэр Харбалаах олохтоохторугар, тэрийээччилэргэ улахан махталын биллэрдэ:  «Не знаю как отблагодарить, вы все такие молодцы. Отец бы видел все это…»  диэн суруйда.

Ытык киһибит аатыгар сүгүрүйэр тэрээһиннэр манан бүппэттэр. Николай Якутскай аатын сүгэр оскуолабытыгар анал уроктар, кылаас чаастара, квест оонньуулар буола тураллар. Оттон Барахов аатынан судаарыстыбаннай түмэл ааспыт нэдиэлэттэн саҕалаан улуус оскуолаларыгар быыстапка туруоран кылаастарынан «Николай Якутскайдыын көрсүһүүлэри» тэрийэн саҕалаабыта. Онон улуус үгүс оскуолаларын үөрэнээччилэрэ Николай Якутскайдыын өссө да көрсүһүөхтэрэ уонна каникулларга төрөөбүт нэһилиэгэр кэлэн түмэлигэр, төрөөбүт дьиэтигэр сылдьыахтара.

Светлана Копыленко,

Барахов аатынан судаарыстыбаннас түмэлин салайааччыта.

Үөһээ Бүлүү.

Хаартыскалар Светлана Копыленко тиксэриилэрэ