Хаартыска Чурапчы улууһун дьаһалтатын пресс-сулууспатыттан
Бүгүн Чурапчы улууһугар Ил Түмэн бэрэссэдээтэлэ Алексей Еремеев, сис кэмитиэттэр бэрэссэдээтэллэрэ Александр Атласов, Владимир Прокопьев, дьокутааттар Павел Пинигин, Дмитрий Поисеев тыа хаһаайыстыбатыгар оҥорон таһаарыыны өйүүр сорох судаарыстыбаннай боломуочуйаны улууска биэрии туһунан сокуон тула тыа хаһаайыстыбатын тэрилтэлэрин салайааччылара, бааһынай хаһаайыстыбалар баһылыктара, сыһыаннаах тэрилтэлэр салайааччылара, олохтоох бэйэни салайыныы баһылыктара, тыа хаһаайыстыбатын исписэлиистэрэ кыттыылаах «төгүрүк остуол» буолан ааста.
«Төгүрүк остуол» үлэтин Чурапчы улууһун баһылыга Степан Саргыдаев иилээн-саҕалаан ыытта. Дьокутааттар бу иннинээҕи күҥҥэ уонна бу сарсыарда тыа хаһаайыстыбатын тэрилтэлэригэр сылдьан, миэстэтигэр үлэ-хамнас туругун билистилэр. Көрсүһүү иннинэ Дмитрий Поисеев дьокутаат көмөлөһөөччүтүнэн үлэлиир Иван Макаровка дастабырыанньатын туттарда диэн Чурапчы улууһун дьаһалтатын пресс-сулууспата иһитиннэрэр.
Тыа хаһаайыстыбатын боппуруостарыгар баһылыгы солбуйааччы Анжелика Неустроева улууска кыстык хаамыытын, былааны толоруу, о.д.а. боппуруостарга иһитиннэрии оҥордо.
Дьокутааттар нэһилиэнньэни кытта көрсөн тыа хаһаайыстыбатын салаатын өйүүргэ аналлаах биирдиилээн боломуочуйалары биэрии мэхэниисимин сэргэ бу салаа тыын суолталаах кыһалҕаларын дьүүллэстилэр. Кэпсэтиигэ бочуоттаах сынньалаҥҥа олорор Иван Пономарёв, “Чурапчы” ТХПК бэрэссэдээтэлэ Николай Петров, Болугур нэһилиэгин баһылыга Руслан Васильев, “Мындаҕаайы” кэпэрэтиип бэрэссэдээтэлэ Прокопий Старостин, “Комплекс” ХЭТ бэрэссэдээтэлэ Александр Тимофеев, бааһынай хаһаайыстыбаларын баһылыктара Данил Павлов, Евдокия Таныкова, Мария Луковцева, Лариса Ноева, Дмитрий Захаров уо.д.а. баар кыһалҕалары быһаарарга парламент көмөлөһөрүгэр туруорустулар, туһааннаах сокуоҥҥа көрүүлэрин биллэрэн этиннилэр, кэккэ ыйытыыларыгар хоруйдары ыллылар.
Ил Түмэн сис кэмитиэтин бэрэссэдээтэллэрэ Александр Атласов, Владимир Прокопьев бу сокуону оҥоруу ис хоһоонун, туох боломуочуйаны, быраабы уонна эбээһинэһи биэриэҕин, үбүлээһин хайдах уонна туох дьарыктаах тэрилтэлэргэ бэриллиэҕин быһаардылар.
Алексей Еремеев: «Аммалары кытары эһиги этиилэргит маарыннаһаллар, Чурапчы тыа хаһаайыстыбатыгар өрөспүүбүлүкэ инники күөнүгэр холобурга сылдьар улууһа буоларынан, бэриллиэхтээх боломуочуйаны сүгүүгэ хайдах быһаарынаргытын өрөспүүбүлүкэ улуустара бары кэтээн, күүтэн олороллор», — диэтэ. Спикер дьон санаатын, туруорсууларын аһаҕастык этиммитин, сөптөөх кэпсэтии тахсыбытын бэлиэтээтэ.
Улуус баһылыга Степан Саргыдаев улуус тыатын хаһаайыстыбатын бары үлэһиттэрэ үүт сыанатын үрдэтии, хотон тутуутун инвестбырагыраамаҕа киллэрии боппуруоһа чуолкай быһаарылыннаҕына, өссө күүскэ үлэлииргэ бэлэмнэрин, ити хайысхаларга парламент өттүттэн күүс-көмө хайаан да баар буолуохтааҕын туһунан эттэ. Степан Саргыдаев Алексей Еремеевкэ кормопроизводствоҕа наадалаах МТЗ-82 тыраахтыры реестргэ төттөрү киллэрии уонна «Туймаада» агрохолдинг балаансатыттан Мындаҕаайы кэпэрэтиибин улуус балаансатыгар биэрии туһунан туруорсуу суругу туттарда.
Онон “төгүрүк остуол” кыттыылаахтара сүрүннээн тыа хаһаайыстыбатыгар оҥорон таһаарыыны өйүүр судаарыстыбаннай боломуочуйалары улуустарга биэрии туһунан сокуону өйүүллэрин биллэрэн, элбэх этиилэрин боротокуолга киллэттэрдилэр.
Бүгүн Өлүөнэ өрүс хаҥас кытылыгар үөрүүлээх быһыыга-майгыга Өлүөнэ күргэтин бастакы тирэҕэр өйдөбүнньүк бэлиэни туруорар тэрээһин…
2024 сыл от ыйыгар Дьокуускай куорат биир саҥа тутуутугар нус-хас олох тохтообута. Сэттис мэндиэмэҥҥэ олорор…
Хортуоскаттан эрэ буолбакка, атын оҕуруот аһыттан минньигэс, туһалаах пюре оҥоһулларын билэҕит дуо? Бу маннык илдьиритиллибит…
Саха сиринээҕи тырааныспар борокуратуурата сымнаҕас сыттыктаах суудунаны кытары сибээстээх түбэлтэнэн бэрэбиэркэ ыытар. Бүгүн, алтынньы 21…
Алтынньы 20 күнүгэр Куокуй орто оскуолатын дириэктэрэ Петров И.И. биһиги иистэнэр сыахпытыгар соһуччу бэлэхтээх киирэн…
Саха сирин үөрэхтээһинин сүрүннүүр исписэлиистэр уонна парламентарийдар Төрүт сокуоҥҥа үөрэххэ сыһыаннаах көннөрүүлэри өйүүллэрин биллэрдилэр. Кинилэр…