Норуот көҕүлээһинин бырайыага

Биһиги уһуйааммыт:

Төрөппүт тылын истэр,

Кырдьаҕаһы ытыктыыр,

Кыаммакка көмөлөһөр

Айылҕаҕа харыстабыллаахтык сыһыаннаһар,

Ийэ дойдуну таптыыр

Киниэхэ бэриниилээх буолар

дьон буола улааталларыгар

сатабыллаахтык дьоһун үлэни ыытар.

Дьокуускай куорат 102-с нүөмэрдээх «Подснежник» уһуйаан иитиллээччилэрин төрөппүттэрэ уонна Птицефабрика түөлбэ олохтоохторо “Норуот бүддьүөтэ” бырайыакка – норуот көҕүлээһинин өйүүр бырагыраамаҕа  куонкуруска кыттаары, “Нейро+”(сенсорнай хос) бырайыактарын бэлэмнииллэр.

Оҕо ситиһиилээх киһи буола улаатара, киһи быһыытынан үүнэрэ-сайдара, ис духуобунай култуурата, майгыта-сигилитэ, өйө-санаата, тыла-өһө кыра сааһыттан төһө чочулларыттан, сайдарыттан улахан тутулуктаах. Уһуйааҥҥа сылдьар оҕолор сайдар эйгэлэрин тэрийэргэ дьулуһуохтаахпыт.

Ону таһынан кэлиҥҥи кэмҥэ үөрэхтээһин эйгэтигэр ОВЗ диэн тиэрмин элбэхтэ көстөр, этиллэр буолла. ОВЗ-лаах оҕо диэн – доруобуйатыгар хааччахтаах оҕо. Доруобуйаларыгар хааччахтаах оҕолор сөптөөх усулуобуйаҕа, кинилэр ис туруктара бөҕөргүүрүгэр, уйулҕата тирэхтээх буоларыгар бу хос туһалаах көдьүүһэ олус элбэх.

Анемподист Иванович Софронов-Алампа “Холбоһор хотуулаах, кыттыһар кыайыылаах” диэбитинии, норуот көҕүлээһининэн ыытыллар хамсааһын өссө да сайда-үүнэ турарыгар бары дьулуһан туран үлэлээтилэр. Ол курдук, бырайыагы өйүүр мунньахха, төрөппүттэр уонна көҕүлүүр бөлөх кыттыыны ыллылар. Бэйэлэрин өйүүр тылларын төрөппүттэр, олохтоохтор эмиэ тиэртилэр.

Үүнэр сылга норуот толкуйдаабыта туоларыгар, санаабыта ситэригэр, ылсыбыта ыпсарыылаах буоларыгар баҕаран туран, уонна бу санааҕа тирэҕирэн, биһиги бырайыакпыт куонкуруска кыайан, олоххо киириэ диэн бигэ эрэллээхпит.

Н.Н.Иванова, көҕүлүүр бөлөх чилиэнэ,

А.И.Голомарева, уһуйаан иитээччитэ.