Хаартыска Антонина Максимова тиксэриитэ
Садын оройуонун (билиҥҥитэ Мииринэй) Ботуобуйа сирэ-дойдута былыр былыргыттан дьон аймах сөбүлээн олохсуйбут сирэ буолар. Олохтоохтор бултаан, сүөһү, сылгы, таба иитиитинэн дьарыктанан олорбуттара.
Матвей Павлович Данилов (1925–1995) өбүгэлэрэ бу сиртэн силис тардан, оҕо-уруу тэнитэн олорбуттара. Дьонун утумнаан, кини үлэһит чулуута, майгылаах бастыҥа киһи этэ. Сэрии саҕаланыытыгар 7 кылааһы бүтэрэн, холкуоска үлэлээбитэ, сэбиэккэ сэкирэтээрдээбитэ. Онтон исландскай шпат хостуур эспэдииссийэҕэ оробуочайдаабыта. 1944 с. Садын райпотребсойууһа Дьокуускай к. потребительскай кэпэрээссийэ тиэхиньикумугар үөрэххэ ыыппыта, онно сылдьан сэриигэ ыҥырыллыбыта. Илиҥҥи фроҥҥа хорсуннук сэриилэспитэ. Сэрии кэннэ полковой оскуолаҕа үөрэнэн, младшай сержанынан Забайкальскай байыаннай уокурукка сулууспалаан, 1950 с. демобилизацияламмыта. Сэрии кэнниттэн дойдуну чөлүгэр түһэрии, тыа хаһаайыстыбатын өрө тардыы сылларыгар Матвей Павлович олохтоох сэбиэт бэрэссэдээтэлинэн үлэлиир, кытыы сир кыһалҕатын билэр буолан, сөптөөх дьаһаллары ылан, нэһилиэк сайдыытыгар улахан үтүөлээх. Кэлин “Новай“ сопхуос дириэктэрин солбуйааччынан, партком сэкирэтээринэн, 3 №-дээх отделение (Таас Үрэх) управляющайынан ситиһиилээхтик үлэлээбитэ. Өр сылларга “Билии” уопсастыба лектора этэ.
Кэргэнэ Марфа Ильинична — үлэ, тыыл бэтэрээнэ, өр сылларга сүөһү көрүүтүгэр үлэлээбитэ. Билигин ыччаттара араас идэлэри баһылаан, үлэ үөһүгэр сылдьаллар. Бу буоллаҕа өбүгэ ситимэ, быстыбат тирэҕэ.
Бу күннэргэ нэһилиэккэ сэрии бэтэрээнэ, салайааччы Матвей Павлович Данилов төрөөбүтэ 100 сылын бэлиэтииллэр.
Матвей Павлович бойобуой сырыыта, килбиэннээх үлэтэ үрдүк сыанабылы ылбыта. Аҕа дойду сэриитин II истиэпэннээх уордьанын (1985 с.), “Германияны кыайыы иһин”, “Японияны кыайыы иһин”, үгүс үбүлүөйдээх мэтээл уонна ”Саха сирин маҥнайгы алмаастарын арыйыы кыттыылааҕа” бэлиэ хаһаайына. Мииринэй оройуонун уонна Таас Үрэх с. бочуоттаах олохтооҕо.
Буойун, үлэ, сэрии бэтэрээнин дьоһун олоҕо кэнчээри ыччакка үтүө холобур буолар.
Антонина Максимова.
Ботуобуйа нэһилиэгэ, Мииринэй.
Хаартысканы ааптар тиксэрдэ.
Мин Кириэс Халдьаайыга кэлиэхпиттэн Мария Фёдоровнаны оскуола остолобуойугар көрөрүм уонна учууталларга ураты ытыктабыллаахтык сыһыаннаһарын бэлиэтиирим.…
Норуот сомоҕолоһуутун күнүн чэрчитинэн Дьокуускайга улахан патриоттуу тыыннаах кэнсиэр ыытыллар. Манна байыаннайдартан турар «Мы Есть…
Анал байыаннай дьайыы кыттыылаахтарын 10 мөлүйүөн солкуобайга диэри иэстэрин тохтотуу быраабылатыгар сокуон үлэлииригэр өссө биир…
Бу күннэргэ хоту дойду үгүс олохтоохторо кыстыыр балыктарын булунаары, айахтарыгар сииллэригэр анаан муус аннынан балыктыыллар.…
Күһүн, кыһын хаар түстэҕинэ, ириэрдэҕинэ, суолга муус-хаар бөлтөркөйдөр үөскээн, массыынаҕа да, сатыы дьоҥҥо да мэһэйдииллэр.…
Бүгүн, алтынньы 29 күнүгэр, Дьокуускай куорат Губинскай уокуругар саҥардыллыбыт Ефимов уулуссата үлэҕэ киирдэ. Бу суол…