Норуот уус-уран оҥоһугун күнүн көрсө — сонун быыстапка

РФ Бэрэсидьиэнэ Владимир Путин 2022 сыл бэс ыйын 17 күнүнээҕи 384 №-дээх «Норуот уус-уран оҥоһугун күнүн туһунан» ыйааҕар  бэс ыйын бүтэһик өрөбүлүн күнүн иннинээҕи өрөбүлгэ бу бэлиэ күн бэлиэтэнэрин ыйбыта.  Быйыл Норуот уус-уран оҥоһугун күнэ  бэс ыйын 18 күнүгэр түбэһэр.

Бүгүн, бэс ыйын 5 күнүгэр, «Симэх»  национальнай галерея, Өксөкүлээх Өлөксөй аатынан Норуоттар доҕордоһууларын дьиэтин иһинэн үлэлиир аҕыйах ахсааннаах норуоттар култуураларын салаата, норуоттар ассамблеялара кыттыһан, бу күннэргэ буола турар аҕыйах ахсааннаах норуоттар «Бакалдын» (эбэҥкилэр), «Эвинек» (эбээннэр) национальнай бырааһынньытарын чэрчитинэн хотугу улуустар иистэнньэҥнэр быыстапкаларын арыйар дьоро күнү тэрийдилэр. Ол курдук, Анаабыр уонна Аллараа Халыма улуустарыттан София Захарова, Анаабыртан Афина Дарианова, «Аборигенка» Аҕыйах ахсааннаах норуоттар иистэнньэнэрин түмсүүтүн салайааччыта Ия Герес, Өлөөн эбэҥки национальнай оройуонун бэрэстэбиитэлэ Надежда Степанова өр сыллаах үлэлэрэ быыстапкаҕа турда.