«Облачнай поликлиника» технология көдьүүстээх хардарыта сибээһи олохтуур

Мэдиссиинэҕэ информационнай технологиялар үрдүк таһымҥа тахсаллар. Ол да иһин, ханнык баҕарар тэрилтэ докумуоннары, эмтэнээччилэри кытары үлэлэһэргэ табыгастаах буоллун диэн сыыппаралаах тиэхиньикэни киллэрэргэ дьулуһар.

Холобурдаан эттэххэ, “Фтизиатрия” научнай-бырактыычаскай киин 2020 сылтан  “облачнай поликлиника” сиэрбиһинэн үлэлиэҕиттэн өрөспүүбүлүкэ бары кэриэтэ улуустарыгар, ол иһигэр, Арктика улуустарыгар тэлэмэдиссиинэ көмөтүн оҥордо.

“Фтизиатрия” быраастара этэллэринэн, Киин амбулатория-поликлиника подразделениеларыгар “Облачнай поликлиника” технология киллэриллэн, быраас анаммыт кэмҥэ онлайн-эрэһииминэн көрөр. Ол эбэтэр, ййн сүбэ-ама ылыан баҕалаах киһи чахчылара регистратураҕа киллэриллэллэр, регистратура сайаапкалары быраастарга ыытар, быраастар бириэмэ анаан, онлайн сибээһинэн сүбэ-ама биэрэллэр, ол түмүгүнэн тустаах эмтэнии ананар.

Чуолаан, ковид ыарыыта турар кэмигэр маннык өҥө олус табыгастааҕа бэлиэтэнэр.

СӨ Доруобуйа харыстабылын министиэристибэтин чахчытынан, 2021 сыл түмүгүнэн,  Саха сиригэр “Облачнай поликлиника” эрэгийиэннээҕи сиэрбиһинэн 98 тыһыынча кэриҥэ киһи туһанна, 647 кэриҥэ быраас 30 тыһыынча киһиэхэ ыраахтан сүбэни-аманы биэрдэ.