Оҕолор cаунаҕа хлор паарыттан сүһүрбүттэр

Дьокуускай куоракка ааспыт сыл саҕаланыыта чааһынай тэрилтэни тэриммэтэх, юридическэй сирэй буолбатах киһи бассейннаах уонна паарданар сирдээх дьиэни-уоту арыандалаабыт уонна харчылаһар туһуттан сауна арыйан үлэлэппит.

Кини саунатыгар киһи доруобуйатын бөҕөргөтөр өҥөлөрү оҥоруохтааҕын, бассейн уутун кээмэйин, ону сэргэ салгын «эргийиитин» учуоттаабатаҕын түмүгэр уонна хлордаах бассейнҥа сөтүөлээн оҕолор сүһүрбүттэр. Ааспыт сыл олунньутугар бу саунаҕа сааһын ситэ илик оҕо төрөөбүт күнүн бэлиэтээбиттэр. 7-12 саастаах оҕолор бассейнҥа сөтүөлүүр кэмнэригэр хлор паарынан тыынан сүһүрбүттэр. Суһал мэдиссиинэ көмөтүн ыҥырбыттар, оҕолор балыыһаҕа киирбиттэр.

Киһи доруобуйатыгар туһалыахтааҕар буортулуур өҥөнү оҥорбутун иһин Дьокуускай куорат 36 саастаах  олохтооҕор РФ Холуобунай кодексатын 238 ыст.1 чааһынан Холуобунай дьыала тэриллибит. Силиэстийэ кэмигэр быһылаан туохтан буолбута барыта быһаарыллыбыт. Уорбаланааччы буруйун толору билиммит. Онон Холуобунай дьыала буруйдуур түмүктээх суут көрүүтүгэр ыытыллыбыт.