Оҕолор Кириэмил харыйатыгар сырыттылар

Биэс сыллаах тохтобул кэнниттэн Судаарыстыбаннай Кириэмил дыбарыаһыгар бастыҥ устудьуоннарга, үөрэх олимпиадаларын, айар куонкурустар, спортивнай күрэхтэһиилэр кыайыылаахтарыгар, ону тэҥэ анал байыаннай эпэрээссийэ кыттыылаахтарын оҕолоругар анаан Бүтүн Арассыыйатааҕы Саҥа дьыллааҕы харыйа бырааһынньыктааҕы уоттара өссө төгүл умайдылар.

Арассыыйа бэрэсидьиэнэ Владимир Путин көҕүлээһининэн Кириэмил Саҥа дьыллааҕы харыйатын сөргүтүү улахан суолталаах түгэнинэн буолла, дойду үрдүнэн уонна чугас сытар өрөспүүбүлүкэлэртэн 5000 кэриҥэ оҕону түмтэ. Олор истэригэр Саха сириттэн 32 оҕо кытынна.

РФ бырабыыталыстыбатын бэрэссэдээтэлин солбуйааччы уонна Уһук Илиҥҥи федеральнай уокурукка бэрэсидьиэн боломуочуйалаах бэрэстэбиитэлэ Юрий Трутнев оҕолор Саҥа дьыллааҕы баҕа санааларын толоруу улахан суолталааҕын тоһоҕолоото.

«Кириэмил Саҥа дьыллааҕы харыйата Арассыыйа бары эрэгийиэннэриттэн саамай талааннаах уонна кыһамньылаах оҕолору түмэр, үгэс буолбут бырааһынньык буолар. Быйыл оҕолор сэргэх бырагырааматтан астыннылар: интерактивнай былаһааккалар, остуоруйалыы сиэдэрэй хаартыскаҕа түһүү зоналара, баҕа санаа, дьаныардаах буолуу, үтүө санаа уонна доҕордоһуу суолтатын чинчийэр «Заветные куранты» диэн испэктээк. Маннык айаннар оҕолорго үөрүүнү, эрэллээх буолууну, өйөбүлү иҥэрэллэр», — диэн бэлиэтээтэ СӨ үөрэҕин уонна наукатын министиэристибэтэ.

Саха сирин үөрэнээччилэрэ олус баай култуурунай-сырдатар бырагыраамалаах этилэр. Поклоннай хайаҕа баар Кыайыы музейыгар сылдьан, дойду историятын дьоруойдуу түбэлтэлэрин биллилэр. Оҕолор кыһыҥҥы Москваҕа экскурсияҕа сылдьан, сүрүн кэрэ-бэлиэ сирдэрин көрдүлэр уонна Саҥа дьыллааҕы куорат ураты эйгэтигэр умсугуйа күүлэйдээтилэр. «Измайлово» гостиница комплексыгар оҕолору «Бастакы хамсааһын» тэрээһин официальнай тэрийээччилэрэ дьарыктарынан, оонньууларынан аралдьыттылар.

Кириэмил Саҥа дьыллааҕы тэрээһинэ оҕолорго сэргэх бырааһынньыгы, умнуллубат түгэннэри эрэ буолбакка, дьулуурдаах, көҕүлүүр күүстээх санааны, үөрүүнү-көтүүнү бэлэхтээтэ. Маннык тэрээһиннэр оҕолорго дойду улуу историятыгар иитиигэ, айар кыахтарын сайыннарыыга, патриотическай киэн туттууну бөҕөргөтөргө көмөлөһөллөр, Арассыыйа бары муннуктарыттан оҕолор сомоҕолоһоллор.