Оҕону ийэ тылынан иитиэххэ

Дьокуускай куорат уокуруктааҕы норуот айымньытын киинин иһинэн үлэлиир 16 филиалыттан биирдэстэрэ — К.И. Максимова-Сайыына аатынан Духуобунас киинэ буолар.

Норуот айымньытын киинэ Дьокуускай куорат туох баар култуурнай тэрээһинин иилээн-саҕалаан, дьон сырдыкка, кэрэҕэ тардыһар майгытын, санаатын уһугуннарар сүдү соруктаах.  Норуот айымньытын киинин научнай- методическай үлэҕэ дириэктэри солбуйааччы  Ушницкая Ньургуйаана Егоровна салайар. Бүгүн духуобунас киинин үлэтин-хамнаһын  туһунан исписэлиис Арина Андреевна Дягилева сырдатта:

— 2023 сыл саҥатыгар 16 филиал бырайыагын көрүү-истии түмүгүнэн, “Ийэ тыл илгэтэ” (“Материнский язык – души целитель”) диэн бырайыагынан Арассыыйа бэрэсидьиэнин граныгар кыттан кыайыылааҕынан тахсыбыппыт. Бырайыак чэрчитинэн оҕолорго анаан саха тылыгар сыһыаннаах тэттик видеолары устубуппут. Онтубут видео-тылдьыт буолан тахсыахтаах. Кииммит араас тэрилтэлэри кытта алтыһан үлэлиир, ол иһигэр Сайыына сырдык санаатыттан саҕыллыбыт “Айыы кыһата” национальнай гимназия саха омук саргыта салалларын туһугар соргулаах суолунан сэргэстэһэ хаамар. “Ийэ тыл илгэтэ” бырайыак куонкурус кыайыылааҕа буолуон инниттэн оскуола үөрэнээччитэ  уонна төрөппүт кыттыылаах хас да видеолар уһуллубуттара. Сүрүн кыттааччылар Саша Дягилева ийэтинээн Арина Андреевнаны кытта кыттан “Алгыстаах ийэ тылым», Л.Попов “Маҥаас ньирэй” хоһооно, “Оҕо саас остуоруйа дойдутуттан…” видеолар тахсыбыттара. Уу сахалыы, киһи сүрэҕин-быарын манньытар  дорҕоонноох оҕо саҥатын дьон сэргээбитэ, сэҥээрбитэ “Материнский язык – души целитель” диэн ааттаах бырайыак буолан тахсарыгар олук буолбута. Кэлин 2-с кылаас үөрэнээччитэ Марат Ноев эһэтэ Тимофей Васильевичтыын  “Тимир оҥоһуктар, ону сэргэ  ийэтинээн Роксана Тимофеевналыын устубут  “Ийэ тыл илгэтэ”,  “Оҕо саас остуоруйа дойдутуттан…” диэн хомуур видео устуутугар кытта сонун үлэлэр тахсыбыттара. Маннык тэрээһиннэр дьиэ кэргэни сомоҕолууллар, оҕону сахалыы саҥарарга көҕүлүүллэр. Саша Дягилева кыратыгар эһэлээх эбэтигэр Үөһээ Бүлүү Хоротугар иитиллибит, аныгы олоххо улахан да дьон күннээҕи кэпсэтиитигэр туттубат  сахалыы саҥалаах оҕо. Марат Ноев эмиэ эбээ, эһээ оҕото, эр киһилии дьоһуннаах, олохтоох толкуйдаах, саҥарара эмиэ  лоп-бааччы. Ол эрэри билиҥҥи ийэ тылбыт туругун боппуруоһа оҕо иннигэр эрэ турар эппиэтинэс буолбакка, улахан дьон биһиги эппиэтинэспит буолар. Күннээҕи кэпсэтиигэ чэпчэки суолу батыһан, кэбэҕэстик нууччалыы тылга көспөккө,  бэйэни күһэйэн да туран, ыраастык сахалыы саҥарарга кыһаллыахтаахпыт. Оҕолорбут айылгылара сайҕанан, суураллан хаалбатын туһугар сахалыы салгыны илдьэ сылдьалларыгар сахалыы ийэ тыл  эйгэтин үөскэтиэхтээхпит.  Ийэ тылы кытта үлэҕэ 7-с кылаас үөрэнээччитэ Владислав Горохов “От үлэтэ” диэн кэмпириэнсийэҕэ кыттыбыт матырыйаала эмиэ видео буолан тахсыбыта. Владислав  кыра эрдэҕиттэн сайын ахсын дойдутугар Сунтаарга тиийэн оттоһон төһүү күүс буолар. От үлэтин буһуутун-хатыытын, сыратын-сылбатын кыра сааһыттан билэр. Владислав дьоно, аймахтара олохторун дьаһананыыларынан, сыһыаннарынан, төрүт үгэһи тута сылдьалларынан  улаатан эрэр оҕоҕо үтүө холобур буолаллар.  Бу видеолары уруокка туһаныахха сөп. Ол курдук, сах саҕаттан саҕыллыбыт саха омук барахсан үйэлээх үгэһин, мындыр билиитин сиик гынан симэлиппэт, сүтэрбэт туһугар сахабыт тылын таһымын үрдэтиэҕиҥ, ийэ тылбытын таптыаҕыҥ, тыыннаах кэрэ эйгэтин харыстыаҕыҥ. Ону хас биирдиибит суолталаатахпытына, хас биирдиибит бэйэбититтэн саҕалаатахпытына эрэ кыаллар суол.