Оҕону көрдөрөргө табыгастаах сыһыарыы оҥоһулунна

“Якутия” технопаарка резиденэ “Под присмотром” диэн мобильнай сыһыарыыны оҥорон таһаарда. Бу оҕолору быстах кэмҥэ көрдөрөргө ньээҥкэлэри көрдүүргэ анаммыт сыһыарыы буолар.

Кистэл буолбатах, төрөппүттэр ханна эрэ суһаллык бараары гыннахтарына, оҕо көрөр киһилэрэ суох буолан хаалааччы. Дьэ, аймахтарыттан, доҕотторуттан ньээҥкэ көрдүү сатаан, эрэйи көрөөччүлэр. Оттон уулуссаттан билбэт киһилэрин ыҥырыахтарын эмиэ да дьаарханаллара өйдөнөр буоллаҕа.

Бу сыһыарыыга анал идэлээх иитээччилэр, педагогтар, мэдиссиинэ үлэһиттэрэ, устудьуоннар үлэлииллэр. Докумуоннара бэрэбиэркэлэммит, мэдиссиинискэй киниискэлээх буоланнар, төрөппүттэр куттаммакка ыҥырыахтарын сөп.

Үлэ төлөбүрүн бэйэлэрэ дуогабардаһаллар. Ортотунан 1 чааһа 300 солкуобайынан быһыллар.

— Бу сыһыарыыбыт төрөппүттэргэ да, ньээҥкэлэргэ да табыгастаах. Төрөппүттэр быстах кэмҥэ көрдөрөргө түргэнник ньээҥкэ булаллар, оттон ньээҥкэлэр сүрүн үлэлэрин таһынан харчылаһар кыахтаахтар. Ньээҥкэлэри таларга докумуоннарын бэрэбиэркэлиибит, ол иһин төрөппүттэр холкутук оҕолорун көрдөрө хаалларар кыахтаахтар, — диэн бырайыак төрүттээччитэ Виолетта Никитина кэпсиир.

Эдэр урбаанньыттар, чахчы, баар кыһалҕаны быһаарар сыһыарыыны аныгы ньыманан толкуйдаабыттар. Ол иһин сыһыарыы тута таһаарыылаахтык үлэлээн барда. Бу сыһыарыынан номнуо 300-тэн тахса төрөппүт, 100-тэн тахса ньээҥкэ туһаннылар. «Под присмотром» сыһыарыыны App Store уонна Google Play маҕаһыыннартан хачайдаан ылыахха сөп.

Бу сыһыарыы уратыта диэн – ньээҥкэлэр өҥөлөрүнэн туһаммыт дьон сыана туруорар, санааларын суруйар кыахтаахтар, ону таһынан, оҕо көрдөрөр кэмнэригэр тэйиччиттэн сылдьан, видеонан быһа көрөн олоруохтарын сөп. Бу кэмҥэ ньээҥкэ төлөпүөнэ видекамера буолан, дьиэҕэ буола турар барыта көстөр буолар эбит.