Оҕону муҥнааһынынан холуобунай дьыала тэрилиннэ

СӨ Силиэстийэлиир кэмитиэтэ иһитиннэрбитинэн, кыра саастаах оҕону муҥнааһынынан холуобунай дьыала тэрилиннэ. Бэҕэһээ саайпытыгар алта саастаах оҕону ийэтэ кырбаабытын туһунан суруйан турабыт. 

Ол курдук Алдан куоракка Молодежнай уулуссаҕа баар элбэх кыбартыыралаах дьиэ олохтооҕуттан ыаллыы олорор кыбартыыраларыттан оҕо ытыырын уонна араас тыас-уус иһиллэрин туһунан полицияҕа суһал иһитиннэрии киирбит. Онуоха  полиция отделын участковайа ыйыллыбыт аадырыһынан тиийбитэ, алта саастаах уол уонна биир саастаах кыысчаан  ийэлэрин уонна кини дьукааҕын кытта бааллар эбит. Уолчаан кырбаммыт эбит.  Тута оҕолору балыыһаҕа  илдьибиттэр.

СӨ Силиэстийэлиир кэмитиэтин Алдан оройуонунааҕы Силиэстийэлиир отделын силиэдэбэтэлэ РФ Холуобунай кодексын 117 ыст. 2 ч. «г» п. (истязание несовершеннолетнего, заведомо для виновного находящегося в беспомощном состоянии) холуобунай дьыала тэрийдэ.