Охчут Степанида Артахинова Арассыыйа Кубогар бастаата

Успуорт үтүөлээх маастара Степанида Артахинова бүгүн, бэс ыйын 10 күнүгэр, доруобуйаларыгар хааччахтаах спортсменнар ортолоругар оҕунан ытыыга тус зачекка Арассыыйа Кубогар бастаата. Ити туһунан «Өрөгөй» спортсменнары бэлэмниир киин телеграмыгар иһитиннэрэллэр.

Блочнай ох күрэхтэһиитигэр түмүктүүр түһүмэххэ Саха сирин сүүмэрдэммит хамаандатын лидерэ Степанида Артахинова Москва уобалаһын охчутун Анастасия Джиоеваны кыайда (141-135).

Онтон норуоттар икки ардыларынааҕы кылаастаах успуорт маастара Виктор Скрыбыкин үрүҥ көмүс мэтээли ылары ситистэ. Биирдиилээн күрэхтэһиигэ түмүктүүр түһүмэххэ тиийдэ, ол эрээри, аҕыйах ахсаанынан 145-147 Юрий Куянковка (Санкт-Петербург) хотторон кэбистэ.