Олох улахан оскуолатын аастылар

“Акрос” хааччахтаммыт эппиэтинэстээх тутуу тэрилтэтигэр биригэдьииринэн Никита Иванович  Фомин үлэлиир. Кини Найахыга 1988 сыллаахха күн сирин көрбүтэ.

Ника оскуола кэнниттэн судаарыстыбаннай муниципальнай управлениеҕа буҕаалтыр үөрэҕэр киирэн баран, ситэри үөрэммэтэх.
Аҕата И.Н.Фомин эдэр сааһыгар ыарахан ыарыыттан күн сириттэн күрэммитэ. Ийэтэ А.Д. Фомина – ытык-мааны ыал ийэтэ, эбээтэ. Ника бииргэ төрөөбүттэрэ бэһиэлэр. Кэргэнэ Д.Н.Фомина Чурапчыттан төрүттээх,омук тылын учуутала, икки уол оҕолоохтор. Аҕалара Иван Николаевич оҕолорун кыра эрдэхтэриттэн саахымакка үөрэтэн, Сергей, Николай, Иван, Ника улууска, өрөспүүбүлүкэҕэ биллэр саахымаччыттар.
Ника сынньанар кэмигэр дьиэ кэргэнин кытары айылҕаҕа сылдьарын, бултуурун сөбүлүүр, ырыаһыт, инники былаана элбэх. Г.Нь.Гаврильев Абый улууһугар Белай Гораҕа ийэтин Алена Васильевна дойдутугар төрөөбүт. Алена Найахыга олорор, идэтинэн хореограф. Григорий аҕата Ньургун Гаврильев Найахы олохтооҕо, ковид ыарыыттан эдэр сааһыгар хомолтолоохтук олохтон барбыта.
Гришалаах бииргэ төрөөбүттэр бэһиэлэр.Ыал аҕата Ньургун Гришатын үлэҕэ кыра эрдэҕиттэн сайын куоракка, тыаҕа мас үлэтигэр өрөмүөҥҥэ, тутууга илдьэ сылдьар эбит. Ол иһин, Гриша билигин тутууга мындыр, кыһамньылаах үлэһит. Оскуола кэнниттэн Гриша аармыйаҕа Хабаровскайга сулууспалаабыта,онтон Дьокуускайга индустриальнай-педагогическай кэллиэскэ автомеханик үөрэҕин бүтэрэн, Нерюнгри куоракка «Якутуголь” чох хостуур тэрилтэҕэ силиэсэринэн, “КОЛМАР” тэрилтэҕэ машиниһынан үлэлиир. Бу чох хостуур “КОЛМАР” тэрилтэҕэ симиэнэнэн ууну кэһэ сылдьан үлэлиир ыарахан үлэ эбит, ууну шахтаттан обортороллор. Ити ыарахан үлэҕэ сылдьан тымныйан ыалдьан үлэлии барбатах, тутууга барбыт. Эбэлээх эһэтэ Антонина Захаровна, Василий Петрович Гаврильевтар Найахыга олороллор,кинилэр тустарынан сиэннэрэ наһаа үчүгэйдик ахталлар. Григорий уһаайба атыылаһан, бэйэтигэр дьиэ туттар былааннаах. Бииргэ үлэлиир табаарыстара Антон Гаврильев Найахыга күн сирин көрбүтэ, ийэтэ З.Е Гаврильева Бороҕонтон төрүттээх, Москвиннар диэн киэҥ аймахтар. Занда Намнааҕы педагогическай кэллиэһи бүтэрбит, уруһуйдьут идэлээх, билигин куоракка “Хоз маркет” атыы киинигэр администратордыыр.Антон аҕата С.П.Гаврильев баахтаҕа “Газпром” тэрилтэҕэ стропольщигынан, иллэҥ кэмигэр харабылынан үлэлиир. Антон Найахы оскуолатын бүтэрэн, Дьокуускайга “ЯАТУГА”-га авиатехник үөрэҕэр түөрт сыл үөрэммитэ уонна сварщик, силиэсэр идэлэрин баһылаабыта. Кини Нерюнгри куоракка 2022 сыллаахха экскаватор идэтигэр үөрэнээт, сир баайын хостуур хампаанньаҕа силиэсэринэн, Дьокуускайга кэлэн автосервис аһан үлэлэппитэ. “ Акрос” хампаанньаҕа 2024 сылтан үлэлиир. Үлэһит быһыытынан эппиэтинэстээх, тылыгар турумтуо, массыына өрөмүөнүгэр, тутууга ыҥырыыга сылдьар.
Ити курдук, “Акрос” тэрилтэ тэриллиэҕиттэн тутуу үлэһит уолаттара куоракка, улуустарга элбэх ыал олорор дьиэтин, сынньанар дьиэлэри, биисинэс эбийиэктэрин тутан, дьон биһирэбилин, махталын ыллылар. Уолаттар хас биирдии эбийиэк саҕаланыаҕыттан бүтүөр диэри эппиэтинэстээхтик сыһыаннаһар буолан, олус хаачыстыбалаахтык туталлар. Тутуу салайааччытыгар, үлэһит уолаттарга Никаҕа, Гришаҕа, Антоҥҥа олохторугар ситиһиини, доруобуйаны баҕарабын, бэйэлэрин, чугас дьоннорун дьол, үөрүү арыаллыы сырыттын.

Галина БОРИСОВА-ТОЛБООНО