Хаартыска -- Елена Потоцкая.
Бу күннэргэ Арассыыйа урбаанньыттарын күнүн чэрчитинэн Креативнай нэдиэлэ ыытылла турар.
Бүгүн “Сахамедиа” пресс-киинигэр ыытыллыбыт «төгүрүк остуолга» ас-үөл эйгэтигэр үлэлиир урбаанньыттар креативнай гастрономия сайдыытыгар олохтоох оҥорон таһаарааччылары кытта бииргэ үлэлээһин хайысхаларын ырыттылар, санааларын атастастылар.
— Ил Дархан Айсен Николаев “Олохтоох оҥорон таһаарыыны уонна туризмы сайыннарыы туһунан” саҥа ыйааҕар 2030 сылга диэри аһы-үөлү оҥорон таһаарыыга кэккэ тэрээһиннэри ыытарга сорудахтаабыта. Ол курдук, бу эйгэҕэ үлэлэһэр 15-тэн итэҕэһэ суох олохтоох оҥорон таһаарыыны сайыннарыыга үлэлэһэр территория баар буолуохтааҕын ыйбыта. Бүгүҥҥү күҥҥэ икки улууска – Горнайга уонна Хаҥаласка оннук хамсааһыны тэрийэргэ быһаардыбыт. Маны таһынан, 10 көрүҥтэн итэҕэһэ суох таба, убаһа эттэриттэн экспортка туһуламмыт бородууксуйаны оҥорон таһаарыы уонна билиһиннэрии соруга турар, — диэн бэлиэтээтэ тыа хаһаайыстыбатын министиэристибэтин аһы астааһын уонна перереработка бырамыысаланнаһын отделын салайааччытын солбуйааччы Майя Никитина.
«Төгүрүк остуолга» араас бренд буолбут ас бэлэхтэрин оҥорон таһаарар, бэйэ аһыттан оҥоһуллар аһы-үөлү киэҥ араҥаҕа тарҕата сылдьар ааттаах-суоллаах асчыттары кытта кинилэри сөптөөх аһынан-үөлүнэн хааччыйан үлэлэһэ сылдьар, эмиэ ааттара дорҕоонноохтук ааттанар тэрилтэлэр салайааччылара кыттыны ыллылар, санааларын атастастылар.
Ол курдук, “Лабыкта” ХЭУо салайааччыта Татьяна Бравина “деликатес” дэнэр бородууксуйанан сонун көстүүлээх, харахха быраҕыллар бэлэҕи оҥоруу туһунан үлэ уопутун атастаста.
— Бренд-бэлэх логотиба, аата-суола чопчу, судургу буолара ордук. Холобура, “Лабыкта” диэн тыл нууччалыы билэр омукка судургутук өйдөнөр гына иһиллэр, ааҕыллар. Тоҕо бэлэх “Лабыкта” диэн ааттааҕый? Бу таба сиир аһылыга – ол аата “хоту сир” диэн өйдөбүл үөскээтэ. Салгыы “экология, ыраас айылҕа” диэн толкуй кэлэр. Доруобуйаҕа туһалаах – үһүс өйдөбүл. Ити курдук чопчу өйдөбүлү биэриэхтээх. Сурукка тиийэ толкуй үөскүүр. Биһиги дьон болҕомтотун тардаары көннөрү алфавит буукубата буолбакка, “новгородскай” дэнэр ширииби туһаммыппыт, —— диэн санаатын үллэһиннэ Татьяна Бравина.
Бэрт кэрэхсэбиллээх санаатын “Республика” эрэстэрээн шеф-пуобара Герман Усов тиэртэ. Кини олохтоох бородууктаттан араас ааптарскай бүлүүдэни оҥоруохха сөбүн бэлиэтээтэ. Ол курдук, асчыт сугунтан үс араас туманы оҥорон таһаарар эбит.
Ити курдук, «төгүрүк остуолга» 10 араас идэлээх исписэлиис санаатын үллэһиннэ. Хас биирдии киһи толкуйа, этиитэ, туһугар, сонун сүүрээн. Ону сиһилии сыыйа сырдатыахпыт.
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…
Дьокуускайга Эргэ куорат биир дириҥ устуоруйалаах, мааны, сэргэх, сырдык оҥоһуулаах оройуонунан биллэр. Манна киһи күнүстэри,…