Олоҥхо ыһыаҕар «Сэһэн түһүлгэтэ» аан бастаан тэриллиэҕэ

Бэс ыйын 20-21 күннэригэр Амма улууһугар 17-с төгүлүн ыытыллар Олоҥхо ыһыаҕа буолара аҕыйах күн хаалла. Бэлэмнэнии, тэрээһин үлэтэ үмүрүйэн эрэр. Ол чэрчитинэн, Медиакииҥҥэ тэрийээччилэр пресс-кэмпириэнсийэни ыыттылар.

Аммалар хас да сыл устата бэлэмнэнэн, сөҕүмэр үлэни ыыппыттар. Бу туһунан пресс-кэмпириэнсийэҕэ кыттыбыт, Олоҥхо Ыһыаҕын тэрийэр хамыыһыйатын бэрэссэдээтэлэ, вице-премьер Сергей Местников уонна култуура, духуобунай сайдыы миниистирэ Афанасий Ноев бэлиэтээтилэр. Амма улууһун баһылыга Степан Кузьмин бу хаалбыт күннэргэ күргүөмнээхтик үлэлээн, ыһыаҕы дьоһуннук ыытыахпыт диэн эрэннэрдэ уонна көмөлөспүт спонсордарга махтанна. Ыһыахха олоҥхо, оһуохай түһүлгэлэригэр, биллэн турар, улахан болҕомто ууруллуоҕа. Маны таһынан, саха төрүт кулууратын атын көрүҥнэригэр улахан  түһүлгэлэр тэриллэллэрэ кэрэхсэбиллээх.

Тойук умнулла быһыытыйда, онон тойукка улахан болҕомто ууруллан, туспа түһүлгэ тэриллиэҕэ. Тойугу туойуу туспа ирдэбиллэрдээх, ол ньымаларга үөрэтиэхтэрэ.

Кэнники кэмҥэ кыл кырыымпанан оонньооччу, оҥорооччу да элбээтэ. «Кыл Саха» ансаамбыл улахан түһүлгэ тэрийээри, бэлэмэнэнэр. Манна даҕатан эттэххэ, «Кыл Саха» салайааччыта — аммалар бэйэлэрин кыыстара Анна Томская.

Креативнай индустрияны сайыннарыыга иистэнньэҥнэр улахан кылааттарын киллэрэ сылдьаллар. Маастардар түмэллэри кытта ыкса үлэлэһэр буоллулар. Түмэллэргэ баар былыргы таҥастары, киэргэллэри сөргүтэн тигэллэр, оҥороллор. Кинилэргэ туспа түһүлгэ баар буолуоҕа. Чороону, кытыйаны уһанар уустар уонна туой иһит маастардара ох курдук оҥосто сылдьаллар. Кинилэр түһүлгэлэрин «Чороон XXI үйэ» хампаанньа иилиэҕэ-саҕалыаҕа.

Тимир уустар түһүлгэлэрэ өссө кэҥиэҕэ. Бэс ыйын 19 күнүттэн тимир болгуону уһааран барыахтара. Манна быһаҕы, батыйаны оҥорууга эрэ буолбакка, саха кыптыыйын, боккуобаны, ат уостуганын, иҥэһэтин оҥорууга күрэс ыытыллыа. Уустар саҥа таһымҥа тахсан, оҕолору, ыччаты үөрэтэллэр.

Бу түһүлгэлэргэ элбэх маастар-кылаастар ыытыллыахтара, маастардардыын кэпсэтии, алтыһыы буолуоҕа.

Маны сэргэ, «Сэһэн түһүлгэтэ» диэн бөлүһүөктэр түһүлгэлэрэ аан бастаан тэриллиэҕэ. Саха тылын кэскилин, тыа сиргэр ыччаты олохсутуу, саха итэҕэлэ, о.д.а. тыын боппуруостары тула ырытыһыы, санаа атастаһыы, бөлүһүөктээһин, анаарыы буолуоҕа. Манна Дьокуускайтан «Күөрэгэй» түмсүү кыттыһар санаалаах.

Амма — мелодистар, суруйааччылар биһиктэрэ. Онон ыһыахха суруйааччылар, хоһоонньуттар, ырыа айааччылар, ХИФУ учуонайдара  кыттыахтара.

Саха бриллиантовай цииркэтэ (салайааччы Сергей Расторгуев), Олоҥхо тыйаатыра, о.д.а. улахан кэлэктииптэр түмсэн, ыһыах аһыллыытын-сабыллыытын сиэдэрэй, умнуллубат оҥорорго үлэлии сылдьаллар. Нэһилиэктэртэн элбэх кыттааччы киирэн, кыттарга бэлэмнэнэр.

Онон, алгыстаах Амма сиригэр тыһыынчанан дьон мустан, саха төрүт култууратын, үгэстэрин өрө тутан, өрө көтөҕүллэн, ыллаан-туойан, үҥкүүлээн, кэрэни кэрэхсээн, уруйдуохтара-айхаллыахтара.