Олунньуттан социальнай төлөбүрдэр үрдүөхтэрэ

Олунньу 1 күнүттэн федеральнай социальнай төлөбүрдэр 11,9 % үрдүөхтэрэ. Ол иһигэр Ийэ хапытаала, доруобуйаларынан хааччахтаах, дьон, бэтэрээннэр, Арассыыйа дьоруойдара ылар төлөбүрдэрэ, ону сэргэ оҕолоох ыал судаарыстыбаттан ылар көмөлөрө эмиэ улаатыаҕа.

Бу туһунан РФ бырабыыталыстыбатын уурааҕар премьер-миниистир Михаил Мишустин илии баттаата. Ийэ хапытаала бастакы оҕоҕо билигин 524,5 тыһыынча буоллаҕына, олунньуттан 586,9 тыһыынча солкуобай буолуоҕа. Оттон иккис уонна онтон кэлэр оҕолорго 693,1 тыһыынчаттан 775,6 тыһыынча солкуобайга диэри улаатыаҕа. Оҕо төрөөбүтүгэр эбэтэр оҕону иитэ ылыыга көрүллэр биир кэмнээх төлөбүр 22,9 тыһыынча солкуобайга тэҥнэһиэҕэ.

— РФ бэрэсидьиэнин дьаһалынан олунньуттан социальнай төлөбүрдэр 12 бырыһыан үрдүөхтэрэ. Бу үрдэтии федеральнай бүддьүөккэ көрүллэн турар. Социальнай төлөбүрдэр бырабыыталыстыба тус хонтуруолугар сылдьаллар, — диэн иһитиннэрэр бырабыыталыстыба бэҕэһээҥҥи мунньаҕар премьер-миниистир Михаил Мишустин.