Оҥоһуу өй административнай буруйу быһаарарга көмөлөһүө

2026 сылтан Дьокуускайга саҥа технология — оҥоһуу өй (ИИ) киирэрин, ол административнай буруйу уонна кутталлаах түгэни быһаарарга көмөлөһүөҕүн туһунан куорат мээрэ Евгений Григорьев тг-ханаалыгар таһаарбытын туһунан Дьокуусквй дьаһалтатын пресс-сулууспата иһитиннэрэр.

Куорат баһылыга эппитинэн, бу систиэмэ устар камералар көмөлөрүнэн быраабы кэһиилэри бэйэтэ булан быһаарыа.

Холобур, камера сыыһа парковкаланыыны, вандализмы, бөҕү-саҕы мээнэ сиргэ быраҕыыны уо.д.а. түргэнник бэлиэтиир буолуо. Итини сэргэ суол кутталлаах туругун курдук быһыыны-майгыны быһааран, тустаах сулууспалар түргэнник үлэлииллэригэр көмөлөһүө.
Камера устубут чахчылара (күнэ-дьыла, бириэмэтэ, миэстэтэ) буруйдааҕы административнай эппиэккэ тардарга туоһунан буолуоҕа.
Эрдэ иһитиннэрбиттэрин курдук, билигин киин куоракка 850 кэриҥэ камера баар, 2025 сыл бүтүүтэ 1000-ҕа тиийиэхтээх. Биэс сыл анараа өттүгэр куоракка 100-н тахса камера баара бэлиэтэммит.